E enjtja e parlamentit ka nisur, si për studentët ashtu edhe për qeverinë.
Si cdo ditë të enjte zhvillohet seanca plenare, mirëpo ndryshe nga ditët e tjera, edhe protesta studentore sot do zhvillohet përpara parlamentit. Ata vijojnë me këmbënguljen e tyre për plotësimin e kërkesave dhe nuk kanë ndërmend të dorëzohen. Nga ana tjetër, kryeministri Rama është treguar i gatshëm që të plotësojë kushtet e tyre por jo pa bërë dialog.Ditën e sotme në Kuvend do të ketë përfaqësi nga Partia Demokratike dhe nga Lëvizja Socialiste për Integrim.
Kujtojme se opozita bojkotoi Kuvendin që në shtator por sot, kauza e studentëve e ka kthyer në seancen plenare. Mësohet se nga PD të pranishëm në sallën e Kuvendit janë deputeti Ervin Salianji, Izmira Ulqinaku, Valentina Duka si dhe Luçiano Boçi, ndërsa nga LSI janë Petrit Vasili, Luan Rama, Kejdi Mehmetaj, Floida Kërpaçi.
Ndërkohë studentët janë mbledhur para godinës së parlamentit duke vijuar protestën e tyre me fleta të bardha nëpër duar, me brohoritje dhe thirrje kundër qeverisë.
Nga policia është kërkuar që të mbajnë distancë pasi është krijuar një kordon i dytë policor.
