Skema e vlerësimit të pensioneve vazhdon të jetë me probleme buxhetore, ndonëse ligji i pensioneve në vendin tonë ka pësuar ndryshime 22 herë. Pas auditimit në Institutin e Sigurimeve Shoqërore, KLSH KLSH pas auditimit që ka zhvilluar në lidhje me këtë skemë ka dalë në përfundimin se as reforma e pensioneve e bërë nga qeveria në vitin 2014 nuk ka qenë efektive. Sipas raportit reforma nuk ka dhënë zgjidhje problematikave të skemës së sigurimeve shoqërore në vend, e cila për të mbuluar gropën buxhetore duhet të financohet çdo vit me miliona euro nga taksat e qytetarëve shqiptarë.
Sipas KLSH në vitin 2021 ndihmesa që qeveria dha nga buxheti i shtetit për pensionet përllogarite 37.7 miliardë lekë, ose rreth 320 milionë euro. Deficiti buxhetor vjen si pasojë e pamjaftueshmërisë së të ardhurave që vijnë nga kontributet , të cilat nuk mbulojnë dot shpenzimet e skemës së pensioneve duke krijuar një borxh të vazhdueshëm vit pas viti.
Aktualisht për çdo kontribues ka 1.42 përfitues. Shkalla e zëvendësimit (pension mesatar/ kontribute mesatare) është shumë e ulët, duke nxitur informalitetin në këtë drejtim. Gjithashtu Shqipëria vijon të ketë një nivel të ulët të të ardhurave nga kontributet shoqërore në raport me prodhimin e Brendshëm Bruto, duke shënuar 5.4% në vitin 2021.
KLSH ngre alarmin se ka një numër të konsiderueshëm të subjekteve debitore prej më shumë se 103 mijë njësi (kryesisht të biznesit të vogël), duke shkaktuar pasoja të këtyre kontribuesve në përfitimin e pensioneve.
Në kushtet aktuale KLSH ka rekomanduar të ISSH në bashkëpunim me Ministrinë e Financave dhe Ekonomisë të hartojë Strategjinë e Zhvillimit të sistemit të Sigurimeve Shoqërore, me qëllim arritjen e konsolidimit të skemës, si dhe të mundësojë rritjen e performancës nëpërmjet një reforme të qëndrueshme që I përgjigjet problematikave të sistemit të sigurimeve shoqërore.
