Ditën e sotme Kreu i grupit parlamentar të PS-së, Taulant Balla në fjalën e tij në seancën parlamentare nga foltorja e Kuvendit diskutoi për sa i takon çështjes së sulmit kibernetik dhe vendimit drastik të qeverisë për ndërprerjen e marrëdhënieve diplomatike me Iranin, opozita dhe mazhoranca të bëhen bashkë.
Balla theksoi po ashtu se lidhur me aktin normative që flamuri i BE-së të jetë në institucionet publike, Kuvendi duhet të tregojë rolin e tij udhëheqës duke bërë maksimumin në procesin për integrimin e plotë europian. Fjalën e tij ai e mbylli duke thënë se është e turpshme që një i shpallur non-grata (referuar Berishës) livadhis i qetë dhe se të gjitha përbetimet e opozitës gjatë verës se në shtator do kishte revolucion ishin pa rezultat.
“Kur u godit nga hakerat UK para pak kohësh u habitën të gjithë si u paralizua e gjithë struktura digjitale e vendit, ne në 15 korrik u goditëm nga një sulm i sofistikuar që dështoi me sukses. Të gjithë ata që nxituan të dalin në konferenca shtypi duke dënuar qeverinë, po mirë sot? Ça do bëni?! Asnjë nga ju nuk ma merr mendja se mban krahun e Iranit, po qeveria mori dje një vendim të vështirë por të bazuar në prova konkrete pas një hetimi të thellë, se një nga 4 rrugët e terrorizmit kibernetik ishte e përfshirë në atë sulm. S’ka asnjë dyshim se pas këtyre sulmeve fshihet Republika Islamike e Iranit. Nëse unë do isha në opozitë, gjëja e parë që do bëja do ishte të thoja se ky është një moment kur natyrshëm duhet të jemi të gjithë bashkë.
Duke qenë se jam për vendosjen e flamurit të BE-së përkrah atij kuq e zi, bëj thirrje të miratohet ligji dhe po ashtu në vijim të asaj që kemi rënë dakord në Konferencën e Kryetarëve, roli i Kuvendit është mjaft i rëndësishëm për procesin e integrimit të plotë.
Sëbashku të rrisim kontrollin parlamentar mbi këtë proces dhe se Kuvendi e udhëheq, me ligjbërje. Sa për babëzira, e trathtira, është në turpin e këtij Kuvendi që një non-grata në Britani e SHBA livadhis i qetë dhe gjithë ai përbetim gjatë verës se opozita do bëjë naming, dasma është lajmi më i madh i kësaj vjeshte”-u shpreh Balla.
