Një zënkë që ka degjeneruar deri në përplasje fizike ka ndodhur mbrëmjen e djeshme mes ish-deputetit Ervin Salianji dhe deputetit aktual në Parlament që përfaqëson LSI-në, Ralf Gjonit.
Të ftuar në emisionin “Open”, Salianji dhe Gjoni ashtu si dhe herë të tjera që janë gjendur përballë njëri – tjetrit kanë debatuar ashpër, gjë që ka përfunduar më pas në koridoret e televizionit me përplasje fizike mes tyre.
Debati gjatë emisionit ishte i ashpër, pasi lidhej me pranimin e mandateve nga kandidatët e listave të dy partive opozitare.
Salianji ka thënë se deputetët e “opozitës së re”, nuk i hyjnë në punë as dreqit, por janë futur në parlament për të marrë një rrogë. Ndërkohë që përgjigjja e Gjonit ishte kjo:
“Mos guxo më të ma kujtosh më atë moment. Unë kam familje, turp të kesh! Nuk bëhet fjalë për bojën, por është agresion fizik ndaj familjes sime nga njerëz që zënë pritë në hyrjen e banesës sime. Mos guxo më Salianji të më përdorësh atë episod kriminal për të më kërcënuar”, – tha Gjoni.
“Unë kam turp që dal në të njëjtin ekran me ty, por çfarë të bëj! Ti je budalla! Ti je aty për të marrë një rrogë dhe kaq. Mos ma trash zërin mua se e ke të hollë” – tha Salianji.
Më pas gjithçka ka degraduar dhe në momentin që emisoni ka përfunduar, Gjoni e ka ndjekur nëpër shkallë Salianjin, pasi ky i fundit i përmendi familjen gjatë diskutimit.
Nga ajo që mësohet, Gjoni ka bërrtitur “Ore kujt i përmend familjen ti,” dhe më pasi Salianji e ka qëlluar me shuplakë dhe është dashur ndërhyrja e stafit të televizionit për t’i ndarë.
