Mbrëmjen e sotme një aksident i rëndë raportohet të ketë ndodhur pak më parë pranë Liqenit Artificial të Tiranës.
Sipas dëshmitarëve një automjet i tipit “Peugeot” i drejtuar nga një femër, për arsye ende të panjohura, hipi mbi trotuar duke goditur rreth 10 kalimtarë të pafajshëm.
Raportohet se të paktën dy persona janë në gjendje të rëndë, ku njëri prej tyre gjendej i shtrirë dhe i gjakosur.
Dëshmitarët thonë se skena ishte tepër e rëndë pasi kudo kishte gjak dhe njerëz përtokë.
Madje sipas dëshmitarëve nga vendngjarja, mjeti ishte me shpejtësi dhe mori zvarrë të gjithë njerëzit që për fatin e tyre të keq gjendeshin në trotuar në ato momente. Nuk dihen ende detaje zyrtare nga policia.
Mësohet se këmbësorët B. H., 60 vjeç, V. H., 57 vjeçe dhe A. T., 27 vjeçe, janë dërguar me urgjencë në spital.
Policia ndodhet në vendin e ngjarjes dhe po merret me zbardhjen e plotë të rrethanave të aksidentit.
Njoftimi:
Tiranë/Informacion paraprak
Më datë 15.08. 2022, në afërsi te “Kodra e Diellit”, shtetasja D. G., 29 vjeçe, duke drejtuar mjetin ka aksidentuar këmbësorët B. H., 60 vjeç, V. H., 57 vjeçe dhe A. T., 27 vjeçe, të cilët si pasojë janë dëmtuar dhe ndodhen në spital, nën kujdesin e mjekëve.
Grupi hetimor ndodhet në vendngjarje dhe po punon për sqarimin e rrethanave të aksidentit.
