Një aksident i rëndë është shënuar pasditen e sotme në Portugali. Një autobus turistësh është përmbysur në ishullin e Madeira, në Portugali, duke shkaktuar të paktën 28 viktima.
Lajmi është bërë i ditur nga agjencia e shtypit portugeze Lusa.
‘Ka viktima por nuk kemi ende një numri të saktë,’- ka thënë kryebashkiaku Filipe Sousa. Shoferi i autobusit ka humbur kontrollin e mjetit që ka rënë mbi një shtëpi, në një skarpat në zonën e Canico, në Santa Cruz.
Viktimat besohet se janë të gjithë të kombësisë gjermane. Në bordin e mjetit udhëtonin rreth 57 pasagjerë.
Sipas informacioneve të para mjeti, përpara se të përfundonte jashtë rruge është përplasur me një autobus tjetër. Ekziston frika se bilanci mund të përkeqësohet, sepse ka shumë të plagosur në gjendje të rëndë.
Në vendgjarje ndodhen autoambulanca dhe forca të shumta të policisë.
