Disa minuta më parë një aksident me pasojë vdekjen ka ndodhur në aksin rrugor Rrogozhinë-Elbasan, pranë vendit të quajtur “Bishti i Zhurit”.
Një mjet tip Benz është përplasur me një kamion, e për pasojë ka humbur jetën një prej shoferëve.
Trupi i tij ndodhet ende në mjet, për shkak se përplasja ka qenë shumë e fortë, duke e shtypur totalisht makinën.
Për momentin nuk ka informacion nëse ka pasur persona të tjerë në mjetin tip benz, të cilit nuk i dallohet as targa si pasojë e përplasjes.
Kamioni që është përfshirë në aksident ka qenë i ngarkuar me inerte, ndërkohë që drejtuesi nuk ka pësuar lëndime, dhe siç shihet nga pamjet ndodhet ende brenda në mjet.
Zjarrfikësit dhe grupi hetimor që kanë mbërritur në vendngjarje, kanë konstatuar vdekjen e drejtuesit të mjetit, ndërkohë që ende nuk dihen shkaqet që kanë çuar në këtë aksident me pasoja fatale.
Do të duhet sharrimi i mjetit për të bërë të mundur nxjerrjen e trupit të viktimës.
Burime bëjnë me dije se nuk dihet ende identiteti i shoferit mirëpo policia ka mbërritur në vendin e ngjarjes duke bërë rrethimin e zonës dhe nisjen e hetimit. Nga forcat blu, ende nuk ka njoftim zyrtar për ngjarjen e rëndë.
