Pamjet e publikuara nga Bregu i Lumit nga përplasjet mes banorëve dhe policisë kanë zgjuar reagimin edhe të LSI-së.
Ish-deputetja e LSI-së Silva Caka, në një deklartë ka thënë se askush nuk do të shpëtojë nga padia penale për dhunën shtazarake që qeveria ka shkrtuar në këtë zonë ndaj banorëve.
Sipas Cakës aty janë dhunuar edhe gra e fëmijë, të cilët luftojnë çdo ditë me varfërinë dhe sot janë bërë pre e dhunës së shfrenuar të policisë.
“Jam këtu sot për të denoncuar dhunën shtazarake dhe të pashembullt të qeverisë, të ushtruar te Bregu i Lumit ku nuk kursen as gratë, as fëmijët. Ju ftoj të ndiqni disa pamje.
Sot te bregu i lumit, gra të thjeshta dhe punëtore të cilat luftojnë çdo ditë me varfërinë, gra që luftojnë në mënyrë të përditshme për mbijetesë, gra që luftojnë me papunësinë, u përballën me dhunën e shfrenuar të një policie që nuk ka më objekt luftën ndaj kriminelëve por tashmë objekt të saj ka luftën ndaj qytetarëve të thjeshtë”, deklaroi Caka.
Gjithashtu Caka nuk ka kursyer edhe akuzat, ku këtë herë në qendër të vëmedjes ka qenë Agim Hoxha, kreu i komisariatit nr. 4, ku ndër të tjera sipas ish-deputetes ditën e sotme do të ketë edhe një padi penale ndaj tyre.
“Këto gra po mbronin sot gjakun dhe djersën e tyre të hedhur në ato shtëpi. Ushtruesit e dhunës e kanë një emër. Një prej tyre sot është pikërisht Agim Hoxha, kreu i komisariatit nr 4 edhe eprorët e tij që kanë urdhëruar këtë dhunë të pashembullt e kanë një emër. Duke filluar nga Sandër Lleshaj, Kryeministri dhe gjithë të tjerët. Të gjithë këta do përballen me ligjin dhe askush të mos shpresojë që do t’i shpëtojë padisë penale të drejtuar Prokurorisë së Tiranës për ta sot. As qeveria dhe as drejtësia e kapur nuk do të munden ti shpëtojnë dot përgjegjësit e asaj dhune të ushtruar te Bregu i Lumit”, tha Caka.
