Revista e njohur “Forbes” i ka kushtuar një shkrim të gjatë projektligjit për legalizimin e kanabisit për qëllime mjeksore. Në analizën e saj shkruhet se kultivimi dhe prodhimi i kanabisit do të kenë vetëm qëllim eksporti dhe nuk lejon që shqiptarët të përfitojnë nga përdorimi i kanabisit mjekësor për të trajtuar sëmundje të ndryshme. Projektligji parashikon prodhimin e kanabisit mjekësor dhe atij industrial deri në 150 hektarë tokë, duke filluar nga viti 2023. Shkrimi ka përmendur kundërshinë e opozitës për projektligjin ku thuhet se ky biznes nuk e frenon krimin. Ndërkohë në shkrim përmendet dhe fshati i mirënjohur i Shqipërisë për kultivimin e kanabist Lazarati.
Shkrimi i plotë i revistës “Forbes”:
Shqipëria pritet t’i bashkohet listës së vendeve evropiane që legalizuan kultivimin e kanabisit mjekësor dhe industrial. Megjithatë, kultivimi, prodhimi dhe tregtia do të jenë të destinuara vetëm për eksport. Qeveria shqiptare bëri të ditur më 30 qershor, planin për legalizimin e kultivimit të kanabisit mjekësor dhe kanabisit industrial për kompanitë që kanë një përvojë të tillë në vendet evropiane.
Projektligji krijon një agjenci kombëtare për kontrollin dhe monitorimin e kultivimit dhe përpunimit të bimës së kanabisit për qëllime mjekësore, industriale dhe prodhimin e nënprodukteve.
Projektligji do të lejojë prodhimin e kanabisit mjekësor dhe kanabisit industrial për deri në 150 hektarë tokë duke filluar nga viti 2023.
KANABISI VETËM PËR EKSPORT
Këshilli i Ministrave do të japë licenca për prodhimin e kanabisit për 15 vjet me të drejtë rinovimi. Bizneset e kanabisit që duan të operojnë në sektorët e kanabisit mjekësor dhe industrial në Shqipëri duhet të tregojnë se kanë kapital mbi 86,000 dollarë, të punësojnë të paktën 15 persona dhe të paguajnë një tarifë prej 1.5% të xhiros vjetore të kompanisë.
Por ajo që është më e rëndësishme për projektligjin është se kultivimi, prodhimi dhe tregtimi i kanabisit mjekësor dhe industrial do të jetë vetëm për eksport. Kjo do të thotë që pacientët nuk do të kenë qasje në trajtimin mjekësor të kanabisit dhe kompanitë shqiptare lokale nuk do të përfitonin nga përdorimet e shumta të kanabisit industrial.
OPOZITA E KUNDËRSHTON
Projektligji është aktualisht i disponueshëm në faqen e internetit të konsultimit publik pas së cilës do t’i përcillet Parlamentit. Opozita e ka kritikuar projektligjin e propozuar nga kryeministri i Shqipërisë Edi Rama. Deputeti i opozitës Enkelejd Alibeaj e quajti këtë veprim “një çmenduri” në një postim në Facebook , pasi legalizimi do të lehtësonte prodhimin e mëtejshëm të kanabisit për qëllime trafikimi nën maskën e përdorimit mjekësor. Alibeaj akuzoi se projektligji do të përfitonte vetëm miqtë dhe aleatët e Ramës.
“Kriteret dhe procedurat e përcaktuara në projektligj sqarojnë se licencat për këtë aktivitet do të përfitojnë vetëm miqtë dhe aleatët e Ramës. Të gjithë e dinë që në një vend ku kriminaliteti dhe korrupsioni janë në nivelet më të larta, mbajtja nën kontroll e këtij aktiviteti është e pamundur”, ka shkruar ai.
Në veçanti, Alibeaj iu referua rastit të Saimir Tahirit , ish-ministër i Brendshëm në kabinetin Rama. Tahiri u dënua në vitin 2022 me tre vjet e katër muaj burg për shkak se përmes mosveprimit lehtësoi trafikun e drogës për një grup kriminal i afër me ish-ministrin, i cili përfitoi edhe dhurata prej tyre. Njoftimi i projektligjit erdhi disa ditë pasi Zyra e Kombeve të Bashkuara për Drogën dhe Krimin (UNODC) e renditi Shqipërinë në vendin e shtatë nga 154 vende për kultivimin dhe shpërndarjen e kanabisit në Raportin e saj Botëror të Drogës 2022. Shqipëria njihet edhe si qendër e trafikut të drogës në Ballkan. Në veçanti, vendi shërben si një qendër klasifikimi për heroinën që vjen nga Lindja për t’u trafikuar në të gjithë Evropën. Për më tepër, Shqipëria konsiderohet si një nga prodhuesit më të mëdhenj të kanabisit ilegal në Evropë, pavarësisht përpjekjeve të qeverisë për të reduktuar kultivimin e tij.
LAZARATI
Instituti Italian për Studimet Politike Ndërkombëtare (ISPI) raportoi se krimi i organizuar shqiptar arriti të kultivojë sasitë më të mëdha të kanabisit në Evropë për më shumë se dy dekada. Për shembull, fshati Lazarat dhe rajoni malor i Dukagjinit u bënë simbolet të kultivimit të kanabisit. Edhe pse policia sekuestroi tonelata kanabis dhe mijëra bimë në të dyja vendet në vitin 2014, tregtia ilegale vazhdon të rritet aq shumë sa në vitin 2016, Shqipëria dëshmoi një përhapje të paprecedentë të kultivimit të kanabisit në të gjithë vendin. Autoritetet e zbatimit të ligjit intensifikuan përpjekjet e tyre kundër fenomenit, duke i çuar normat e kultivimit në nivelet më të ulëta historike gjatë pesë viteve të fundit, por bandat e krimit të organizuar diversifikuan trafikun e drogës me fokus kokainën.
Kanabisi rekreativ është i paligjshëm në Shqipëri dhe është përfshirë në listën e substancave të kontrolluara me Ligjin e Substancave Narkotike dhe Psikotropike, i krijuar në vitin 1994. Prandaj, kultivimi, prodhimi, tregtimi, posedimi dhe dhurimi janë rreptësisht të ndaluara. Edhe kanabisi mjekësor është i ndaluar në vend. Prandaj, mjekët nuk lejohen ta përdorin për receta mjekësore dhe projektligji i shpallur dy javë më parë nuk do të ndryshojë situatën aktuale.
Sipas një sondazhi të fundit 308 mijë qytetarë shqiptarë votuan pro legalizimit të kanabisit mjekësor, ndërsa 148 mijë votuan kundër dhe 51 mijë nuk kishin asnjë mendim për këtë çështje.
Megjithatë, vendimi për legalizimin e kanabisit mjekësor dhe industrial duket më shumë një veprim thjesht ekonomik sesa një përpjekje e mëtejshme për të luftuar ose për të frenuar krimin e organizuar.
Duke licencuar kompanitë me kapital, projektligji nuk ka gjasa të shkatërrojë biznesin e paligjshëm. Për më tepër, një legjislacion i tillë i fokusuar vetëm në kompanitë e destinuara për të eksportuar do t’i privonte shqiptarët nga përfitimi medicinal i kanabisit ndërkohë që Komisioni i OKB-së për Drogat Narkotike (CND) e riklasifikoi kanabisin në një listën ndërkombëtare të bimëve mjekësore.
