Ditën e sotme Gjykata e Tiranës ka lënë në burg shtetasin Lulzim Spahia, i cili u arestua nga forcat e policisë, mbrëmjen e së martës pasi iu kap një sasi droge. Spahia rezultonte i shpallur në kërkim nga policia për veprën penale “Vrasja” kryer në bashkëpunim, pasi në bashkëpunim me shtetasin K. B., 26 vjeç, banues në Lushnjë (i arrestuar më parë), në Korçë, më datë 13.06.2021, kanë goditur me sende të forta në kokë shtetasin F. Xh., duke i shkaktuar atij vdekjen.
Bëhet fjalë për ngjarjen e ndodhur në qershor të vitit të shkuar nga ku mbeti i vrarë 25-vjeçari Fridman Xhaferraj , i cili u vra për larje hesapesh pas prishjes së pazareve të drogës. Trupi i tij u gjet i hedhur në rezervuar disa ditë më pas, ku autorët e dyshuar Kristi Bixheku dhe Lulzim Spahia kishin tentuar të fshihnin gjurmët.
Tani 27-vjeçari Lulëzim Spahia do transportohet për në gjykatën Durrësit, ku do zhvillohet seanca për caktimin e një mase tjetër sigurie , dhënë ndaj tij në mungese për trafik të lëndëve narkotike.
Ndërkohë gjithashtu ditën e nesërme Spahia do dalë përpara gjykatës së Korçës, ku do njihet me masën e sigurisë arrest me burg, dhënë ndaj tij në mungesë dhe akuzat e ngritura ndaj tij për vrasjen e Fridman Xhaferrajt, në qershor të vitit të shkuar.
