Pasi kryeministri Edi Rama zyrtarizoi emrin e kandidatit për president mbrëmjen e djeshme, shefin e Shtabit të Përgjithshëm të FA, Bajram Begajn, gazetari Klodian Tomorri ka ironizuar me anë të një statusi në rrjetet sociale duke treguar se doli hapur parashikimi që kishte bërë disa ditë më parë.
Tomorri akuzon Begajn se ka firmosur dorëzimin e pronave të ushtrisë.
“Çfarë rastësie, çfarë rastësie! Shefi i Shtabit që ka firmosur për dorëzimin e pronave të ushtrisë, tani bëhet President”, shkruan gazetari Klodian Tomorri, i njohur për denoncimet e tij ndaj vendimeve të padrejta dhe abuzive të qeverisë.
Kujtojmë se dy ditë më parë ishte pikërisht gazetari Klodian Tomorri që parashikoi skenarin e Edi Ramës me presidentin e ri, një emër ndryshe nga Ilir Meta, që të firmoste letrat e zhvatjes së pronave të ushtrisë në bregdet.
Për gazetarin Klodian Tomorri, Presidenti i ri do ti firmoste Edi Ramës letrat për të nxjerrë nga plan i ushtrisë, 137 hektarë tokë bregdetare, dhe më pas ky i fundit do ti shpërndajë pronat e lakmuara tek oligarkët e tij, shprehet gazetari.
Sipas Tomorrit, Rama ka 5 vite që po tenton ti marrë firmën Metës, por nuk ja ka dalë.
Në një reagim në Fb, ai ka shkruar:
Kur Partia Socialiste thotë që Presidenti të jetë i ndryshëm nga Meta, e ka fjalën që të firmosë ato të nëmura letra për të nxjerre nga Plani i Përhapjes së Marinës, 137 hektarë në bregdet. Kanë 5 vjet që po lodhen dhe nuk po i marrin dot. Janë 60 për qind e të gjithë pronave që kanë bazat e forcës detare. Do ishin bërë me dhjetëra fshatra turistike, hotele dhe resorte tani. Për një copë firme. Ja pra, Presidenti i ri nuk duhet të jetë kundër zhvillimit se na nxin imazhin e Shqipërisë nëpër bote. Sa të emërojmë një President qe e do zhvillimin, pastaj do luftojmë me hunj për te mbrojtur Atdheun. Se Komandën e Forcës Detare do e zhvendosim ne Skrapar. Por këto janë thjesht demet e vogla kolaterale te progresit.
