Mbrëmjen e djeshme 10 punonjës të policisë së shtetit kanë mbetur të lënduar si pasojë e përplasjes mes tifozerive të Romës dhe Feyenoord në rrugët e Tiranës.
Fillimisht kanë qenë tifozët hollandezë ata që kanë tentuar të shkojnë drejt ambienteve ku qëndronin tifozët e Romës, dhe policia ka mundur që të shmangë përplasjen duke i ndaluar.
Ndërkohë që një pjesë tjetër e tifozë të Romës kanë krijuar incidente në zonën e 21-shit, por fatmirësisht kanë arritur që të neutralizohen nga punonjësit e policisë.
Finalja e Konference League mes dy skuadrave do të zhvillohet sot në mbrëmje, ndërkohë që shumë rrugë të Tiranës do të jenë sot të bllokuara, duke penguar lëvizjen e lirë të qytetarëve.
Njoftimi i policisë:
Dje në mbrëmje, një grup tifozësh kanë lëvizur në drejtim të stadiumit “Air Albania” dhe sipas informacioneve tentonin të përplaseshin me një grup tifozësh të skuadrës tjetër.
Shërbimet e Policisë kanë tentuar t’i ndalojnë në rrugën “Mustafa Matohiti”, ku tifozët e skuadrës Feyenoord, në mënyrë të dhunshme kanë goditur punonjësit e Policisë me shishe qelqi, shkopinj, gurë dhe sende të tjera të forta.
Më pas, një grup tjetër tifozësh, të skuadrës së Romës, kanë lëvizur në drejtim të urës së DVP Tiranë ku dhe atje janë përplasur me shërbimet e Policisë duke përdorur gurë, shishe e shkopinj.
Si pasojë e dhunës së ushtruar nga tifozët e të dy skuadrave, janë plagosur 10 punonjës Policie dhe është dëmtuar një automjet policie.
Shërbimet e Policisë kanë bërë të mundur shpërndarjen e tyre si dhe kanë shoqëruar në ambientet e Policisë 60 shtetas nga grupet e tifozëve të dyja skuadrave, 48 shtetas italian dhe 12 shtetas holandez dhe vijon shoqërimi i personave të tjerë, të përfshirë në akte të dhunshme.
Policia e Shtetit bën thirrje për shmangien e veprimeve të dhunshme, që nuk manifestojnë asnjë lidhje me sportin.
Policia e Shtetit është e vendosur për të garantuar rendin dhe sigurinë, për të parandaluar shkatërrimin e pronës si dhe për të garantuar mbarëvajtjen e aktivitetit sportiv që do të zhvillohet në “Air Albania”. Dhe për këtë ka marrë të gjitha masat që parashikon ligji.
Policia e Shtetit kërkon mirëkuptimin e qytetarëve që të mos provokohen nga individë apo grupe tifozësh që mund të jenë nën efektin e alkoolit dhe të njoftojnë menjëherë në 112 dhe Komisariatin Dixhital çdo tentativë të prishjes së rendit dhe sigurisë.
