Transkriptet për të shfajësuar kardiologun Edvin Prifti ekzistojnë por nuk dolën kurrë në pah.
Vendimi i Gjykatës së Posaçme Kundër Korrupsionit dhe Krimit të Organizuar për një çështje paralele lë të kuptohet se ka transkripte që shfajësojnë mjekun, i cili vazhdon ende të jetë i pezulluar nga detyra si kardiolog në Tiranë.
Por duket se ka prova dhe transkripte që tregojnë se në fakt Edvin Prifti i çonte pacientët në spitalin shtetëror dhe jo në privat, ku edhe pretendohet se merrte ryshfet. Ndërkohë që Prifti akuzohet se mbante në bllok të shënuara paratë që u merrte pacientëve. Në rastin që pretendohet se Prifti ka marrë para nga sekretarja e Gjykatës së Krujës, Manuela Mallkuçit, në fakt është krejt e kundërta. Në përgjime të tjera, kardiokirurgu me zërin e tij i thotë bashkëbisedueses (kryeinfermieres që gjithshtu u prangos bashkë me mjekun) se pacientja, në këtë rast nëna e Mallkuçit, duhet të shtrohet në QSUT të operohet. Ndërsa i thotë se nuk ka përse të paguajë.
Në datën 2.2.2020, e pandehura Trëndafila Frangu bisedon me mjekun Edvin Prifti, të cilit i dërgon një mesazh me këtë përmbajtje:
Trëndafili: Besnike Mallkuçi, vjeç 77, kur të vijnë të të takojnë
Edvini: Të vijnë tani pa problem
Trëndafili: Të vinë nesër në orën 8/30, se sot ishte në punë goca
Edvini: Po që sot moj se është e shtruar atje dhe s’ka pse të paguajë. Të vijnë direkt të shtrohen.
Prokurori që kërkoi dënimin e Edvin Priftit është Altin Dumani. Ky i fundit ka një të afërm në repartin e kardiokirurgjisë në QSUT është përfitues direkt pas “djegies” së mjekut Prifti dhe largimi të tij nga departamenti. Emër ende nuk ka por prova po. Transkriptet që ka prodhuar vetë SPAK, duke lënë jashtë detyrës një mjek që i shërben vendit, kur në fakt nuk ka prova të mjaftueshme.
Kardiologu u arrestua pasi iu gjet një vlerë prej 1 milionë euro pasuri. Ai u akuzua nga SPAK për korrupsion dhe pastrim parash, ndërsa SPAK ende nuk i ka përfunduar hetimet në ngarkim të tij. Mjeku u akuzua nga SPAK se mori ryshfet nga sekretarja e gjykatës së Krujës, Manuela Mallkuçi për ti operuar nënën. Zbulimi u bë në hetimet e SPAK për arrestimin e gjyqtares Enkeleida Hoxha. Në përgjime e sipër u zbuluan edhe bisedat e sekretares me infermieren e QSUT, për ti dhënë paratë kardiologut në këmbim të operimit të të ëmës jashtë radhe. Ai u arrestua më 15 shkurt 2021, pasi ndaj tij kishte një masë pezullimi për detyrën. Në çantën e tij të shpinës iu gjetën një bllok shënimesh ku ruante “klientët” dhe 380 mijë euro cash.
