Avioni kishte ndezur motorët dhe ishte gati për fluturim e tij drejt Vjenës, pikërisht pranë tij u krye dhe grabitja e radhës në aeroportin e Rinasit.
Nga dëshmitë e pasagjerëve, tre persona të veshur si komando u afruan pranë avionit duke kërcënuar me armë punonjësit, dhe më pas morën prej andej thasët me para.
Nga informacionet e para, kujtojmë se në këtë ngjarje u grabitën 2 milionë euro.
Por në informimin e minutave të fundit theksohet se shuma ështe rreth 10 milionë euro.
Kjo është shuma paraprake e konfirmuar nga burime policore por ende jo zyrtare.
Paratë i përkisnin disa kompanive të sigurimit dhe sapo ishin ngarkuar në avion kur u morën nga autorët.
Ndërkohë pak minuta pas grabitjes në aeroportin e Rinasit policia ka shoqëruar të paktën 40 persona.
Mes të shoqëruarve mësohet të ketë edhe nga security i aeroportit.
“Balkanweb” ka siguruar foton e viktimës, ku shquhet veshja që mbanin autorët gjatë grabitjes së thasëve me para në pistën e avionit.
Viktima, një prej autorëve, mban veshur një uniformë të ngjashme me ato komando, të kompletuar deri në detaj, me pranga e antiplumb.
Grabitësit kanë marrë paratë dhe janë larguar menjëherë nga aeroporti. Në ikje ata janë shkëmbyer me forcat FNSH-së duke i sulmuar me granata e kallashnikov.
