Ditën e sotme Drejtori i Agjencisë për Median dhe Informimin, Endri Fuga ka reaguar menjëherë për skandalin e shoqërimit të kryeministrit Edi Rama në Gjermani një vit më parë për mosmbajtjen e maskës. Pas publikimit të lajmit në media Endri Fuga ka zgjedhur që të reagojë në rrjetin e tij social “Twitter”, duke pretenduar se Rama nuk ishte shoqëruar për maskën por një prej anëtarëve të ekuipazhit të kompanisë “Lufthansa” ishte sjellë keq me të.
Madje nxorri dhe një e-mail ku pretendohet se kompania ka kërkuar falje për incidentin. Megjithatë vetë nuk denjon që të japë më shumë detaje lidhur me çfarë ka ndodhur në atë fluturim.
“Lajm i vjeter, per nje incident qe ne thelb nuk kishte vendosjen e maskes, por sjelljen e pahijshme te njerit prej anetareve te ekuipazhit. Ndjesa e kompanise u pranua qe ate dite,”-shkruan Fuga.
Kujtojmë se Der Spiegel raportoi sot se Rama është shoqëruar nga policia pasi nuk ka pranuar të vendosë maskën anti-covid. Gjithçka ka ndodhur në bordin e avionit të Lufthansa gjatë muajit dhjetor.
Pasagjerët që kanë qenë dëshmitarë të ngjarjes, rrëfejnë se kreu i qeverisë refuzoi me forcë mbajtjen e maskës mbrojtëse saqë ekuipazhi është detyruar të thërrasë kapitenin për ndihmë. Megjithatë, duke qenë se ai gjithashtu nuk ishte në gjendje të bindte kreun e qeverisë shqiptare për të mbajtur maskën FFP2, ndërhyri policia federale dhe bëri shoqërimin e kryeministrit shqiptar.
