Një ngjarje e rëndë ka ndodhur në Durrës, ku punonjësit e një fasonerie janë paraqitur pranë spitalit në gjendje të helmuar.
Punëtorët e një fabrike që prodhon kabllo e tela për automjetet për llogari të një kompanie gjermani janë helmuar gjatë ditës së sotme vetëm pak minuta pasi kishin shkuar në punë.
Të paraqiturit në gjendje të helmuar në spital ndodhen nën kujdesin intensiv të bluzave të bardha. Një pjesë e tyre janë paraqitur në spital me shenja helmimi, ku kanë marrë mjekim dhe janë jashtë rrezikut për jetën.
“Kishin hedhur ilaç për minjtë dhe nuk na thanë. Nga ilaçi i minjve nisi helmimi. Në repartin tim jemi rreth 100 gra që punojmë”, tha njëra prej grave që po merr serum në urgjencën e Spitalit rajonal të Durrësit.
Punonjëset kanë dëshmuar për “Ballkan Web”, dhe thanë se në fabrikë ishte hedhur bar miu që shkaktoi edhe shenja helmimi masiv te dhjetëra punëtorëve. Fillimisht kanë marrë mjekim nga mjeku i fabrikës, i cili vendosi që puna të mbyllej për sot. Por edhe pse u dërguan në shtëpi një pjesë e punonjëseve që iu kanë vijuar simptomat kanë mbërritur në spital ku kanë marrë mjekim të specializuar.
Mjekët thanë se janë jashtë rrezikut për jetën.
