Mbrëmjen e sotme ka ndodhur një incident pranë Bashkisë së Tiranës ku një person i paidentifikuar ka hedhur një shishe molotov poshtë një makine të parkuar.
Bëhet me dije se makina është në pronësi të Drejtorit të Shërbimeve publike në Bashkinë e Tiranës, Taulant Tusha, drejtorit të tenderave dhe për më tepër njeriu më i afërt i kryebashkiakut ‘tonë’ Erion Veliaj , gjithnjë pas Arbër Maznikut. I përfolur ndër vite si “drejtori i tenderave” dhe jo më kot ku brenda vitit 2016 motra e drejtorit Tusha ka fituar tre tendera përfshirë edhe tenderin e parkimit nga agjencia e parkimit ‘Tirana Parking,’ duke ngritur pikëpyetje për një konflikt të mundshëm interesi.
Por jo vetëm kaq, gjithashtu Drejtori i Shërbimeve publike në Bashkinë e Tiranës Taulant Tusha, ka qenë një ndër personat që është thirrur në Komisionin Hetimor për inceneratorët, por sic dihet tashmë dëshmia e tij nuk u zbulua kurrë pasi ‘normalisht’ u bllokua nga Partia Socialiste për të ruajtur mikun e afërt të Tushës, ‘Lali Erin’.
Ndërkohë nga ana tjetër policia ka nisur hetimet për ngjarjen, por mendohet se do të jetë e vështirë të drejtohet diku gishti për drejtorin e tenderave Tusha.
Po kështu është marrë në pyetje dhe vetë Tusha për të bërë të mundur identifikimin e autorit, i cili ka qenë duke lëvizur me biçikletë kur ka kryer aktin dhe po ashtu është larguar, pa u identifikuar.
Njoftimi i Policisë:
“Më datë 25.03.2022, në afërsi të Bashkisë Tiranë, një shtetas akoma i paidentifikuar që po lëvizte me biçikletë, ka hedhur një shishe, dyshohet me lëndë djegëse, poshtë mjetit të parkuar në pronësi të shtetasit T. T.
Grupi hetimor nën drejtimin e Prokurorisë po punon për identifikimin dhe kapjen e autorit të dyshuar dhe sqarimin e rrethanave të ngjarjes”, njoftoi policia.
“Sqarim
Në lidhje me informacionin paraprak të dhënë për ngjarjen e ndodhur pak më parë ku një shtetas ende i paidentifikuar, ka hedhur një shishe, dyshohet me lëndë djegëse, poshtë një automjeti, ju informojmë se:
Pas verifikimeve të kryera, ka rezultuar që automjeti nuk është në pronësi të shtetasit T. T., por në pronësi të UKT-së Bashkisë Tiranë”.
