Pasditen e sotme një 30-vjeçar me inicialet Sh.Ç., ka ndërruar jetë dhe një person tjetër ka mbetur i plagosur një 22-vjeçar me inicialet A.Ç., si pasojë e një aksidenti automobilistik. Ngjarja e rëndë ka ndodhur në aksin Tepelenë-Përmet, në afërsi të fshatit “Varibop”. Të dy të rinjtë kanë qenë në një mjet të llojit ‘Mercedes Benz”, në momentin që 30-vjeçari ka humbur drejtimin e makinës dhe kanë përfunduar jashtë rruge. Për pasojë, drejtuesi ka ndërruar jetë, ndërsa 22-vjeçari ndodhet në spital.
Njoftimi:
Përmet/Informacion paraprak.
Në aksin rrugor Tepelenë-Përmet, në afërsi të fshatit “Varibop”, automjeti tip “Benz”, me drejtues shtetsin Sh. Ç., 30 vjeç, banues në fshatin Seniçan, Përmet, ka dalë nga rruga.
Për pasojë ka ndërruar jetë drejtuesi i automjetit shtetasi Sh. Ç, si dhe është dëmtuar shtetasi A. Ç., 22 vjeç, banues në fshatin Seniçan, Përmet, i cili është transportuar në spitalin Rajonal Gjirokastër për të marrë ndihmën mjekësore.
Në vendngjarje ndodhet grupi hetimor dhe po punon për zbardhjen e shkaqeve të aksidentit.
Sipas INSTAT, në muajin Shkurt 2022 numërohen 77 aksidente rrugore nga 79 aksidente të ndodhura në muajin Shkurt 2021, duke u ulur me 2.5%, krahasuar me të njëjtën periudhë të një viti më parë. Në dymujorin e parë të vitit 2022 numërohen 184 aksidente rrugore nga 204 aksidente, të ndodhura në të njëjtën periudhë të një viti më parë, duke u ulur me 9,8%.
Në muajin Shkurt 2022, numri i të aksidentuarve (të vrarë dhe të plagosur) është 100 persona nga 103 që ishte në të njëjtën muaj të një viti më parë. Në dymujorin e parë të vitit 2022, numri i të aksidentuarve është 247 persona nga 268 persona të aksidentuar në të njëjtën periudhë të një viti më parë.
