Artisti Robert Aliaj dhe pedagogu i njohur, Edmond Tupe, ishin vetëm dy nga personazhet e famshëm që mbështetën hapur protestën e studentëve gjatë këtyre ditëve.
Ditën e sotme, sipas një njoftimi të policisë, bëhet me dije se po procedohen penalisht 25 persona mes tyre pikërisht dhe Aliaj me Tupen. Në listën janë përfshirë edhe aktivistë të forumeve rinore të partive politike.
“Ata akuzohen se dje në orën 09:00, tek sheshi “Nënë Tereza”, në rrugën “Muhamed Gjollesha”, e më pas në rrugën e “Durrësit”, përpara Ministrisë së Arsimit, kanë protestuar në mënyrë të paligjshme, pa lejen e organeve kompetente duke prishur rendin e qetësinë publike, duke penguar qarkullimin e mjeteve të transportit, duke hedhur sende të forta në oborrin e institucionit”, thuhet në njoftimin zyrtar të policisë.
Në listë janë edhe: Altin Goxhaj, Mirela Ruko, Klodian Leka, Estela Nazarko, Xhuljano Bregasi, Henri Fero, Liri Guci, Gentian Doci, Malbor Duka, Nehbi Bushaj, Klajdi Bello, Redi Muci, Luan Myrtaj, Erdi Bërxulli, Agron Pepaj, Migen Qiraxhi, Bledar Hysa, Adriatik Lapaj. Dhe aktivistët politikë Gaetano Doci dhe Andrea Gjini (LSI), si dhe Kristina Tonal (FRPD).
Policia deklaron se po punon për identifikimin e personave të tjerë që kanë bllokuar rrugën tek sheshi “Rilindja”, pasi janë të fotografuar.
