Personazh i njohur për policinë, Emiljano Shullazi përfundon në spital

Gjykata e Posaçme e Apelit ka dënuar me vendim të formës së prerë me 55 vite burg Emiliano Shullazin dhe grupin e tij, mirëpo sot anëtari i bandës kriminale ka shfaqur gjendje të rënduar shëndetësore dhe ka përfunduar në spital. Nën masa të rrepta sigurie dhe i shoqëruar nga forcat e RENEA-s, Shullazi është marrë nga qelia për tu dërguar në spitalin e burgut, pas shfaqjes së problemeve shëndetësore. Shullazi mbahej nën regjimin “41 bis”. Kujtojmë se së fundmi, Emiljano Shullazi ka kundërshtuar sërish vendimin e Gjykatës së Lartë për qëndrimin brenda izolimit “41 bis”, duke kërkuar ndryshimin e vendimit. Avokatët e kanë konsideruar këtë vendim si të padrejtë për të burgosurin. Emiliano Shullazi është një personazh i njohur për policinë kriminale në vend, por veçanërisht në Tiranë dhe në Durrës. Shullazi është akuzuar për krime të ndryshme të rënda që nga vrasjet, shpërthimet me eksploziv, apo trafik dhe shitje e shpërndarje droge, si dhe akuza të tjera në kuadër të grupit të strukturuar kriminal. Në mënyrë të vazhdueshme ai ka qenë i dyshuar dhe i hetuar disa herë për gjobëvënie dhe shtrëngim me dhunë dhe kanosje për dhënie pasurie. Emiljano Shullazit vijon të jetë në hetim nga SPAK për akuzën e “Vrasjes në rrethana cilësuese”.