Një zjarr i frikshëm është regjistruar në orët e para të mëngjesit të sotëm në një traget në Greqi i cili ishte nisur nga Igumenica dhe do shkonte në Brindisi. Nga ngjarja 11 persona rezultojnë të zhdukur deri më tani pas zjarrit që ra në tragetin e pasagjerëve Euroferry Olympia teksa lundronte në afërsi të Korfuzit . Informacioni për të zhdukurit duket se vjen nga numërimi i parë i përafërt i kryer në varkat e shpëtimit, i cili numëronte 279 persona nga gjithsej 290 pasagjerë (239 pasagjerë dhe 51 ekuipazh) në bordin e Grupit Grimaldi.
Një përfaqësues i grupit të shpëtimit:
Është herët për të bërë një deklaratë. Ne përpiqemi të mbledhim informacionin dhe të krahasojmë sa janë deklaruar në listën e pasagjerëve me ata që u shpëtuan. Është shpëtuar edhe skafi italian, presim numërimin dhe identifikimin në portin e Korfuzit.
Një pasagjer ka folur për MEGA teksa po zbriste nga varka e shpëtimit në një anije të Policisë Ekonomike Italiane që ka nxituar për ndihmë.
Pasagjeri:
Është një humbje. Na zgjuan në orën 4:30 . Zjarri nga ajo që pamë erdhi nga garazhet.
Sipas zv.ministrit të Transportit të Greqisë z.Katsafados, është regjistruar vetëm një i plagosur ndërkohë që në zonë po operojnë tre helikopterë, teksa në ndihmë pritet të vijë edhe fregata Ydra e marinës luftarake greke. Shkaku i zjarrit nuk dihet ende, ndërsa hetimet për zbardhjen e ngjarjes vijojnë.
