Mesditën e sotme, në një kohë ku e gjithë vëmendja është fokusuar në zonën “5Maji”,pas shembjes së banesave në këtë zonë, punonjësit e IKMT-së kanë nisur shembjen e disa banesave të tjera.
Po ashtu edhe disa banorë janë shoqëruar nga policia në zonë e ‘5 Majit’, pasi kanë kundërshtuar shembjen e banesa, pasi shprehen se kanë dokumentacion të rregullt.
Ndërsa në njësinë 4 mësohet se është shoqëruar vetëm një qytetar.
Burime për ‘Balkanweb’ kanë bërë me dije se disa banorë kanë arritur një marrëveshje, por ka edhe shumë banorë të tjerë që nuk janë dakord për akt-marrëveshjen.
Sakaq e gjithë zona ka punonjës të shumtë policie për shkak të tensioneve mes banorëve të cilët nuk kanë arritur në një marrëveshje.
‘Shtëpia është me hipotekë. Jam fqinj i banorëve që po i shembet banesa. Janë njerëz që punojnë nuk kanë pasur probleme. I kanë hedhur në gjyq , edhe unë . Këtu ka ardhur e gjithë policia, nuk kemi çfarë të bëjmë. Ne kërkojmë vetëm të drejtën, nuk kemi asgjë kundër projektit thjesht duam të dimë kush është përgjegjës i projektit dhe se çfarë do të bëhet’, tha një qytetar.
