Gjatë ditës së djeshme, persona të paidentifikuar ende zbrazën karikatorin drejt 5 personave në një lokal në zonën e “Don Boskos” në Tiranë. Viktimë e atentatit mbeti 35-vjeçari Erion Çela, ndërsa u plagosën 4 të tjerë, konkretisht Blerim Çela 28 vjeç i dëmtuar në këmbën e djathtë dhe fytyrë, vëllai i viktimës, Arben Dani 46 vjeç i dëmtuar në këmbë, Azbi Selimaj 19 vjeç i dëmtuar në shpatull, Edmond Crroj 41 vjeç i plagosur në bark dhe këmbë.
Vlen të theksohet se pas krimit, atentatorët u larguan me shpejtësi me një mjeti tip “Benz” në drejtim të Laprakës. Pas ngjarjes që tronditi vendin në fillim të vitit 2022, burime për mediat bëjnë me dije se targat e makinës së autorëve ishin të vjedhura që para dy muajsh në Vorë, gjë që ngre dyshimet se vrasja ka qenë e planifikuar. Policia ende nuk ka gjetur automjetin “Mercedes” me të cilin lëviznin atentatorët, ndërsa është konfirmuar që targat e përdorura ishin të vjedhura.
Burime pranë grupit të hetimit bënë me dije se shënjestër e atentatit, ku u vra një person e u plagosën 4 të tjerë dyshohet të jetë 41-vjeçari i plagosur Crroj. Kjo për shkak të problemeve të mëhershme që ka pasur me drejtësinë. Ai dyshohet të ketë qenë i skeduar në Itali, Francë e Zvicër.
