Prej rreth 3 ditësh, në vendin tonë po qarkullon skandali i shpërndarjes së të dhënave të rreth 690 mijë qytetarëve shqiptarë. Kujtojmë se nga rrjedhja e databazës, në qarkullim dolën ID, numrat e telefoni, targat e 530 mijë makinave dhe rrogat e shqiptarëve.
Ndërkohë të gjitha këto skandale që tregojnë një Shqipëri, ku sundon shteti demokratik, ne sozitë e komunistëve, janë përcjell në media. Në disa raste janë publikuar edhe emrat që ndodheshin në listë. Për këtë ka reaguar Këshilli Shqiptar i Medias dhe Aleanca për Media Etike.
Përmes një reagimi ata konsiderojnë që përderisa këto të dhëna kanë rënë në duar të shumëkujt, medias i takon që në mënyrë të përgjegjshme të orientojë publikun tek ajo pjesë e informacionit që është me interes publik, duke mos cënuar pa të drejtë privatësinë e shtetasve.
Njoftimi:
Media ka të drejtë për të përpunuar të dhënat e rrjedhura për të informuar publikun. Përpunimi i të dhënave duhet të orientohet vetëm drejt temave që kanë interes publik dhe jo që paraqesin kërshëri publike. Të shmangen nga ky përpunim, sa më shumë të jetë e mundur, detajet personale të shtetasve. Në rast se media, konsideron se rroga dhe institucioni që e paguan një individ përbën çështje me interes të lartë publik, para se të publikohen të dhënat e përpunuara, individëve të përmendur duhet t’u jepet patjetër hapësira për të komentuar. KSHM dhe AME, konsiderojnë se sjellja e përgjegjshme e mediave në këtë situatë është kusht themelor për ta orientuar debatin mbi këto lista aty ku duhet: tek interesi më i lartë publik.
