Shqipëria është duke u përballur me një rritje çmimesh të produkteve të shportës, por përjashtim nuk kanë bërë as sektori i hidrokarbureve pra nafta dhe gazi.
Muajt e fundit në Shqipëri jetesa po bëhet gjithnjë e më e shtrenjtë ku rritja e çmimeve është evidente.
Rritja e çmimeve në muajin nëntor shënoi nivelin më të lartë të dhjetë viteve të fundit, duke e çuar inflacionin në 3.1%, përtej objektivit të bankës qendrore prej 3%.
Ndërkohë sot tashmë konsumatorët paguajnë më shumë për ushqimet kryesisht për fruta-perimet, bukën e drithërat që kanë parë rritjen më të madhe, blejnë më shtrenjtë karburantet, teksa rritja e çmimit të lëndëve të para në tregjet e huaja ka bërë që kostot të rriten edhe për të shkuar në kafene e restorante ku shtrenjtimi i i tyre i faturohet konsumatorit final.
Ekspertët shprehen për “Top Channel” se kemi një tejkalim të normës së së objektivit të inflacionit dhe jemi në kushtet e pamundësisë për të konsumuar në nivelet e mëparshme si pasojë e mosrritjes së të ardhurave.
“Flasim për pamundësi për konsumuar s pasojë e zhvlerësimit, pamundësi për të konsumuar në nivelet e mëparshme si pasojë e mosrritjes së të ardhurave, ndërkohë që çmimet sa vijnë e rritjes ndërkohë që jemi në prag festash. Do kemi një rritje çmimesh të vazhdueshme të çmimeve qoftë edhe artificialisht. Kemi një tejkalim të normës së objektivit të inflacionit që nuk vjen nga rritja e kërkesës por nga rritja e çmimit të faktorëve prodhues”, shprehet ekspertja për ekonominë, Elona Shehu.
Ndërkaq përballë kësaj vale të pandalshme të rritjes së çmimeve, ekspertët propozojnë ndërhyrje të bankës qendrore për stabilizimin e tyre, pasi me hyrjen në fuqi të paketës së re fiskale shpjegojnë ata shtrenjtimi i mëtejshëm i tyre është i pashmangshëm.
“Është një sinjal që banka në vetvete duhet të marrë hapa për ta normalizuar situatën sepse nuk kemi të bëjmë me faktorë të përkohshëm, nuk kemi në prapavijë një rritje të kërkesës që ka çuar në këtë rritje çmimesh. Edhe bankat qendrore të vendeve të tjera janë duke rishikuar politikat e tyre”, shpjegon Shehu.
Situata e rritjes së çmimeve duket se i la të pasigurt, ku edhe pse në nëntor besimi i tyre në ekonomi u përmirësua, vlerësimet e tyre për të shpenzuar dhe për të bërë blerje të mëdha në të ardhmen ishin në rënie.
