Skandali i bërë publik dy ditë më parë ku dy vëllezërit indianë të kërkuar ndërkombëtarisht për pastrim parash janë gjetur në Shqipëri dhe me nënshtetësi shqiptare ka ngjallur debate të shumta dhe pikërisht për këtë arsye ka reaguar edhe zyra e Presidentit.
Vetë zëvendës presidentit, Tedi Blushi, ka sqaruar procedurën e pajisjes me pasaportë shqiptare në shkurt të vitit 2018.
Në reagimin publik thuhet se shtetësia për dy vëllezërit është dhënë me propozim të ministrit të Turizmit dhe Mjedisit.
Madje thuhet se nga verifikimet e bëra nga agjencia ligjzbatuese, nuk kanë rezultuar të dhëna problematike për dhënien e shtetësisë shqiptare, ndaj edhe procedura ka qenë tërësisht ligjore.
Reagimi i plotë:
Zëdhënësi i Presidentit të Republikës, z.Tedi Blushi sqaron lidhur me procedurën për dhënien e shtetësisë shqiptare, shtetasve të huaj, z. Nitin Jayantilal Sandesara dhe z. Chetankumar Jayantilal Sandesara, se:
Janë zbatuar procedurat ligjore bazuar në pikën 7, të nenit 9 të ligjit nr. 8389, datë 05.08.1998 “Për shtetësinë shqiptare” të ndryshuar, me propozimin e Ministrisë së Turizimit dhe Mjedisit, “për shkak të eksperiencës në investime dhe historikut të sipërmarrjeve të suksesshme jashtë Republikës së Shqipërisë dhe për shkak të angazhimit të tyre për realizimin e investimeve të rëndësishme elitare në vendin tonë”.
Bazuar në pikën 6, të nenit 9 të ligjit për shtetësinë, janë bërë verifikimet përkatëse nga agjencia ligjzbatuese nga e cila nuk kanë rezultuar të dhëna problematike për dhënien e shtetësisë shqiptare.
