Mbretëresha Elizabeth e Britanisë tha në samitin e Kombeve të Bashkuara për ndryshimet klimatike të hënën setashmë nuk është më koha për fjalë, por për vepra, teksa u bëri thirrje liderëve botërorë të mendojnë për brezat e ardhshëm kur negociojnë një marrëveshje për të kufizuar ngrohjen globale.
Në një video-mesazh në ditën e parë të konferencës në Skoci, mbretëresha u kërkoi udhëheqësve të ngriheshin mbi “politikën e momentit” dhe tha se trashëgimia e një samiti të suksesshëm do të ndihmonte brezat që do vijnë.
95-vjeçarja, monarkja më e vjetër dhe më jetëgjatë në botë, do të merrte pjesë personalisht në Glasgow, por u tërhoq pasi mjekët e këshilluan të pushonte.
“Është shpresa e shumë njerëzve që trashëgimia e këtij samiti – e shkruar në librat e historisë ende për t’u shkruar- do t’ju përshkruajë si liderët që nuk e humbën mundësinë; dhe se ju iu përgjigjët thirrjes së atyre brezave të ardhshëm”, tha mbretëresha.
“Përfitimet e veprimeve të tilla nuk do të jenë aty për t’i shijuar të gjithë ne këtu sot: askush nga ne nuk do të jetojë përgjithmonë. Por ne nuk po e bëjmë këtë për veten tonë, por për fëmijët tanë dhe fëmijët e fëmijëve tanë”, shtoi ajo.
Ajo nderoi bashkëshortin e saj të ndjerë, Princin Philip, i cili vdiq në fillim të këtij viti në moshën 99-vjeçare. Ajo kujtoi se si ai kishte paralajmëruar një mbledhje akademike në vitin 1969 për nevojën për të trajtuar kërcënimet nga ndotja.
“Nëse situata e ndotjes në botë nuk është kritike për momentin, është aq e sigurt sa çdo gjë mund të jetë se situata do të bëhet gjithnjë e më e patolerueshme brenda një kohe shumë të shkurtër,” e citoi ajo të thoshte.
Mbretëresha tha se “nuk mund të ishte më krenare” që puna e tij ishte vazhduar nga dy trashëgimtarët e saj më të afërt, djali i saj Princi Charles dhe nipi Princi Ëilliam, të cilët të dy po marrin pjesë në samit.
