Sekretari i Përgjithshëm i Kombeve të Bashkuara Antonio Guterres u ka bërë thirrje liderëve të G20-ës që të bashkohen për të ofruar zgjidhje për ndryshimin e klimës dhe pandeminë globale të koronavirusit përpara një samiti global për ndryshimet klimatike.
Duke folur në Romë në prag të samitit të G20, shefi i OKB-së u bëri thirrje kombeve të kapërcejnë “nivelet e rrezikshme të mosbesimit” për të shmangur një “katastrofë klimatike” si dhe për të ngushtuar një “hendek imoral” në shpërndarjen globale të vaksinave.
Guterres i bëri thirrje G20-ës që të përmbushë angazhimet për të ofruar 100 miliardë dollarë çdo vit për vendet në zhvillim për financimin e klimës dhe të rishikojë angazhimet e tyre aktuale, të cilat “ende dënojnë botën me një rritje katastrofike prej 2.7 gradësh në temperaturat globale”.
“Objektivi më i rëndësishëm i këtij samiti të G20 duhet të jetë rivendosja e besimit – duke trajtuar burimet kryesore të mosbesimit – të rrënjosura në padrejtësitë, pabarazitë dhe ndarjet gjeopolitike”, tha ai.
Duke iu përgjigjur pyetjeve të gazetarëve, Guterres pranoi se përpjekjet për reduktimin e emetimeve nga Kina dhe Rusia, udhëheqësit e të cilëve nuk do të marrin pjesë personalisht në G20, ishin vendimtare për të trajtuar me sukses ngrohjen globale dhe probleme të tjera klimatike. Ai gjithashtu kritikoi ndarjet gjeopolitike që pengojnë një plan global të vaksinimit kundër COVID-19.
