Kryeministri i Kosovës, Albin Kurti është kërcënuar, ndërsa para shtëpisë së tij janë parë forca të shtuara sigurie. Lajmin e ka konfirmuar edhe zëdhënësi i qeverisë së Kosovës, Përparim Kryeziu.
Kryeziu ka thënë se niveli i sigurisë së Kurtit është rritur për shkak të kërcënimit. Ai ka shtuar se institucionet e hetuesisë janë duke bërë punën e tyre dhe bëjnë vlerësimet e nevojshme për të ndërmarrë masat përkatëse. Kryeministri Kurti ndërkohë, po vazhdon angazhimin e tij të rregullt.
“Kryeministri Kurti është kërcënuar. Për këtë arsye, si masë e kujdesit të shtuar, është rritur edhe niveli i tij i sigurisë. Institucionet e hetuesisë dhe sigurisë tashmë janë duke bërë punën e tyre. Ato bëjnë vlerësimet e nevojshme dhe ndërmarrin masat përkatëse. Në anën tjetër, kryeministri vazhdon angazhimin e tij të rregullt”, ka thënë zëdhënësi i qeverisë së Kosovës.
Nuk është bërë ende e ditur se për çfarë kërcënimi bëhet fjalë dhe kush është personi apo personat që e kanë kërcënuar kryeministrin Albin Kurti, ndërsa mediat në Kosovë raportojnë se vërehet prani më e shtuar e forcave të policisë pranë shtëpisë së tij.
Ndërkohë, Policia e Kosovës nuk ka dalë ende në një deklaratë zyrtare për të sqaruar detajet e rastit në fjalë.
