Dialogu mes Serbisë dhe Kosovës mesa duket mund të sjellë edhe destabilizimin e gjithë rajonit, të paktën kjo ka qenë deklarata e Presidentit Serb, Aleksandër Vuçiç në një intervistë për gjigandin Reuters.
Sipas Vuçiç vonesat që janë duke u bërë për bisedimet nuk janë duke sjellë asgjë të mirë për Ballkanin Perëndimor, i cili sipas tij ende është i prekur nga luftërat e viteve 90. “Çdo ditë vonesë mund të krijojë kushte në të cilat një shkëndijë mund ta ndezë në flakë tërë rajonin. Vendet perëndimore duhet ta dinë këtë”, tha Vuçiç.
Mirëpo edhe pse Vuçiç po e bën të duket si problem i Kosovës ndalimi i bisedimeve, duket thënë se Serbia ka bërë pjesën e vetë për të merituar taksën e famshme të vendosur ndaj mallrave serbe.
Në këtë moment që po flasim pikërisht kjo taksë është shkaku pse Serbia ka ndërprerë dialogun dhe duke thënë që nëse taksa nuk hiqet dialog nuk do të ketë, ndërkohë që nga ana tjetër Prishtina zyrtare është e vendosur në vendimin e saj dhe nuk do të bëjë pas.
Mirëpo jo vetëm Kosova ka probleme nga mosdialogu pasi Serbia e ka kusht kryesor që nëse nuk arrin marrëveshje me Prishtinën atëherë anëtarësimi në Bashkimin Evropian mund të mos ta marrin asnjëherë.
“Pranimi ynë (Serbisë) në Bashkimin Evropian varet nga dialogu me Prishtinën dhe nëse një ditë do të arrijmë një marrëveshje”, thotë në këtë intervistë për Reuters, presidenti serb Vuçiç duke shtuar se ai pret që Gjermania, Franca apo BE-ja të bëhen më aktive në procesin negociues.
“Unë mendoj se ne do të shohim disa nga nismat e tyre në të ardhmen e afërt”, tha ai, pa dhënë më shumë detaje.
