Ditëve të fundit është evidentuar një rritje e theksuar e çmimeve për produktet bazë të konsumit në Kosovë
Kryeministri i Kosovës Albin Kurti është shprehur se do të ketë një paketë masash për të letësuar qytetarët nga rritja e çmimeve të shportës në Kosovë.
Kurti reagoi më anë të një shkrimi në Facebook, ku u shpreh se rritja e çmimeve është e pashmangshme, pasi sipas tij, është e ndikuar botërisht. Paketa e masave sipas tij do i vijë në ndihmë qytetarëve të Kosovës dhe do të bëjë të mundur përballimin me sukses të krizës.
“Kosova, sikurse e gjithë bota, i është ekspozuar një inflacioni që kryesisht vjen si rezultat i katër faktorëve: shkëputjes së zinxhirit të furnizimeve për shkak të pandemisë, rikthimit të konsumit global më shpejt sesa që mund të përshtatej prodhimi i cili gjatë pandemisë ishte stopuar, rritja në nivel global e çmimit të energjisë dhe spekulantët e ndryshëm që bëhen profiterë të krizave. Shkalla e inflacionit sipas Agjencisë së Statistikave në fund të muajit shtator ishte 4.9 për qind, gjë që është në linjë me ngritjen globale të çmimeve për disa produkte”, ka shkruar Kurti.
Kryeministri i Kosovës, ndër të tjera vendosi theksin edhe tek zërat që fajësojnë qeverinë për rritjen e çmimeve.
“Ditëve të fundit jemi dëshmitarë të një fushate e cila trumbeton çdo ditë për rritje çmimesh dhe tenton të fajësojë Qeverinë për këtë. Kjo, në njërën anë, synon t’ua shtrojë terrenin manipuluesve për të ngritur çmimet me pretekstin se tani jemi në një ambient ku secili çmim duhet të ngritët, pavarësisht se a ka ngritje të kostos apo jo, ndërsa, në anën tjetër, tenton të nxisë nervozë e panik te qytetarët. Paniku dhe pritjet se do të ketë rritje çmimesh, ndikojnë në blerje të shtyra nga frika, gjë që pastaj rezulton në mungesë të produkteve në rafte, e rrjedhimisht edhe në ngritje të mëtutjeshme të çmimeve”, thuhet në reagimin e tij.
