Ministrja e Shëndetësisë, Ogerta Manastirliu ka konfirmuar se Komiteti Teknik i Vaksinimit ka rekomanduar një dozë të tretë të vaksinës Covid. Ajo shtoi gjithashtu se është rekomanduar edhe vaksinimi i plus 16 vjeç, ndërsa është diskutuar për vaksinimin e fëmijëve plus 12 vjeç, por që kanë probleme shëndetësore.
Manastirliu tha nga Shkodra se këto rekomandime do të diskutohen ditën e nesërme nga Komiteti Teknik i Ekspertëve dhe pritet të merret një vendim. Ndër të tjera, ministrja bëri u bëri apel qytetarëve të vaksinohen, pasi 95% të të shtruarve në spitale janë të pavaksinuar.
“Vaksinimi është një sfidë mbarë globale dhe patjetër është një sfidë dhe për vendin tonë.
Është e vërtetë, është mbledhur Komiteti Teknik i Vaksinimit të cilët kanë diskutuar dhe kanë rekomanduar përgjatë fundjavës të shkuar, realizimin apo vendosjen në protokoll të dozës së tretë, ose të dozës booster siç quhet ndryshe. Kanë rekomanduar gjithashtu edhe uljen e fashës të grupmoshës për vaksinim, plus 16 vjeç dhe kanë diskutuar gjithashtu dhe kanë rekomanduar edhe vaksinimin plus 12 vjeç, por vetëm për ata fëmijë që kanë problematika shëndetësore. Këto rekomandime të cilat kanë dalë nga Komiteti Teknik i Vaksinimit do të diskutohen ditën e nesërme dhe do të ketë një vendim të Komitetit Teknik të Ekspertëve për përgjigjen ndaj COVID-19 dhe do të kemi dhe një njoftim dhe për vendimet që do të marrë ky Komitet”, tha Manastirliu.
Ajo u ndal edhe te tetori rozë dhe i bëri apel çdo gruaje që të ekzaminohet, ndërsa shtoi se pandemia ka sjellë një lloj neglizhence në kontrollet rutinë.
