Kreu i Policisë së Shtetit, Gledis Nano ka mbledhur strukturat e policisë vendore, pas operacionit që u zhvillua ditën e sotme. Në këtë takim Nani ka prezantuar drejtorin e ri të DVP Lezhë, Oltion Bistri.
Gjatë fjalës së tij, kreu i Policisë së Shtetit ka thënë se lufta ndaj grupe kriminale dhe ndaj kultivimit të kanabisit do të vazhdojë pa kompromis dhe me zero tolerancë. Ai është deklaruar në krahun e drejtorëve të strukturave vendore të policisë dhe ka thënë se disa policie brenda strukturës nuk mund ta prishin imazhin e Policisë së Shtetit, duke zhbërë punën e mirë që është bërë deri tani.
“Lufta pa kompromis ndaj grupeve kriminale dhe toleranca zero ndaj kultivimit të bimëve narkotike janë prioritet dhe sfidë, ndaj së bashku me drejtorin e ri të angazhoheni për t’i dhënë një impuls të ri jo vetëm kësaj sfide, por gjithë prioriteteve që ka Policia e Shtetit.
Më keni në krah në punën tuaj për të arritur objektivat, por ju siguroj se nuk do të tolerohet asnjë punonjës policie që neglizhon detyrën apo më keq akoma, që bëhet palë me krimin. Respektoni qytetarët, shërbejuni atyre duke iu ofruar një shërbim sa më cilësor, zbatoni ligjin dhe vetëm ligjin dhe ju siguroj se do jem përherë suporti juaj.
Disa punonjës policie brenda strukturës nuk mund ta prishin imazhin e Policisë së Shtetit, duke zhbërë punën e mirë që është bërë deri tani, ashtu sikurse disa individë të tjerë nuk mund ta sfidojnë Policinë”, ka thënë Gledis Nano.
