Rreth 1.9 milion qytetarë me të drejtë vote në Kosovë, mund të zgjedhin të dielën udhëheqjen e re të 38 komunave të vendit. Gjithandej Kosovës janë 883 qendra votimi me 2 mijë e 477 vendvotime, në të cilat vota do të përcaktojë se kush nga 166 kandidatë e partive politike do të drejtojë komunat dhe kush nga mbi 5 mijë kandidatë të tjerë, do të zërë vend në kuvendet e këtyre komunave.
Po ashtu liderët politikë të Kosovës, iu kanë bërë thirrje qytetarëve të Kosovës që të votojnë.
Presidentja e Kosovës Vjosa Osmani, thotë se shpreson që qytetarët të dëshmojnë shpirtin e tyre të lirisë dhe demokracisë me pjesëmarrje sa më të lartë në zgjedhje.
“Mirëmëngjes Kosovë! Sot të gjithë votojmë për kualitetin e jetës sonë në komunat ku banojmë. Pavarësisht se në cilën komunë votoni, shpresoj që sërish ta dëshmojmë shpirtin tonë demokratik nëpërmjet pjesëmarrjes sa më të lartë në një proces të drejtë dhe të lirë, e duke i respektuar masat kundër Covid-19. I priftë e mbara Republikës sonë!”, shprehet Osmani.
Ish-kryeministri i Kosovës, Ramush Haradinaj po ashtu ka votuar, ai ka theksuar se qeverisja komunale është shumë e rëndësishme. Haradinaj iu ka bërë thirrje qytetarëve që të votojnë.
“Mirëmëngjes Kosovë. Të gjithë shfrytëzojeni të drejtën për të votuar. Edhe unë votova. Qeverisja komunale është shumë e rëndësishme për jetën tuaj, për jetën e qytetarëve tanë në të gjitha drejtimet. Ju ftoj, vendosni për veten. Votoni, mos e lini votën në shtëpi. Na priftë e mbara Kosovë”, tha Haradinaj.
Kandidati për kryetar të Prishtinës nga Lëvizja Vetëvendosje, Arben Vitia, ka thënë se sot është një ditë shumë e rëndësishme jo vetëm për demokracinë, por edhe për jetët e qytetarëve.
“Në këtë ditë të bukur vjeshte, sapo ushtrova të drejtën e votës. Pas një fushate të gjatë dhe fer nga kandidatët, është një ditë shumë e rëndësishme jo vetëm për demokracinë, por edhe për jetët e tyre. Sot vendosin qytetarët. Ftoj qytetarët që të dalin sa më masivisht në këto zgjedhje. Falënderoj të gjithë ata që i organizojnë këto zgjedhje kaq të mira”, ka thënë Vitia.
