Që në orët e para të mëngjesit të ditës së sotme, policia e Kosovë s ka nisur një operacion në Rajonin e Prishtinës, Pejës, Mitrovicës së Jugut dhe Veriut. Me anë të një njoftimi zyrtar nga policia është bërë me dije se aksioni po realizohet kundër kontrabandës së mallrave.
Mësohet se aksioni është ende në vazhdim, ndërsa janë angazhuar Dogana e Kosovës dhe njësite të profileve të ndryshme policore.
Gjithashtu bëhet me dije se qytetarët në veri të Kosovës po kundërshtojnë këtë aksion të policisë dhe policisë i është dashur që të hedhin gaz lotsjellës për të shpërndarë turmën. Qytetarët serbë kanë sulmuar pjesëtarët e policisë së Kosovës në Mitrovicën e Veriut pas aksionit kundër kontrabandës.
Komunikata e plotë:
Policia e Kosovës, në vazhdën e realizimit të objektivave strategjike për parandalim të veprave penale, konkretisht luftën e pa kompromis ndaj kontrabandës së mallrave, sot në orët e hershme të mëngjesit ka filluar realizimin e një operacioni policor i cili përfshinë disa lokacione të ndryshme, ku bëjnë pjesë katër rajone të Kosovës si Prishtinë, Pejë, Mitrovicë Jugu dhe Mitrovicë Veri.
Të gjitha veprimet policore janë duke u realizuar në koordinim me prokuroritë dhe gjykatat kompetente, me urdhër të së cilave janë duke u kryer kontrolle dhe bastisje në lokacione të ndryshme si shtëpi banimi, lokale biznesi, magazina të mallrave etj.
Në këtë operacion policor i cili është ende duke vazhduar janë angazhuar Dogana e Kosovës dhe njësite të profileve të ndryshme policore, të cilat janë në mbështetje dhe përkrahje të këtij operacioni policor.
Si rezultat i hetimeve intensive dhe veprimeve profesionale policore dhe të Doganës së Kosovës, deri më tani janë sekuestruar mallra dhe dëshmi të ndryshme të cilat shërbejnë si prova materiale.
Policia e Kosovës në bashkëpunim dhe koordinim me autoritetet kompetente do të vazhdojë realizimin e detyrave dhe përgjegjësive të saj në nivel vendi, me qëllim të parandalimit të veprimtarive kriminale, parandalimit të kontrabandës së mallrave si dhe shkatërrimit të grupeve kriminale.
