Një ngjarje e rëndë ka ndodhur mbrëmjen e djeshme rreth orës 22:35, në zonën e “Komunës së Parisit” në Tiranë. Policia ka dhënë informacione zyrtare në lidhje me ngjarjen, ndërsa bëri me dije se kishte mbetur i plagosur një 22-vjeçar. Nga informacionet zyrtare mësohet se i riu është qëlluar në rrethana ende të paqarta brenda mjetit të tij, i cili ndodhej i parkuar. Mësohet se i plagosur ka mbetur shtetasi Redi Balla. Ngjarja ka ngjallur panik te banorët të cilët, kanë dalë në rrugë pasi kanë dëgjuar të shtënat. Mësohet se në vendngjarje kanë mbërritur menjëherë forcat e policisë dhe ambulanca.
Sipas informacioneve të marra mësohet se 22-vjeçari është plagosur në këmbë, ndërsa ndodhet në spital, nën kujdesin e mjekëve. Menjëherë pas ngjarjes së ndodhur, shërbimet e Policisë bënë rrethimin e zonës dhe po vijuan kontrollin e saj për të bërë të mundur identifikimin dhe kapjen e autorit. Grupi hetimor po vijon punën për sqarimin e rrethanave të ngjarjes dhe dokumentin e plotë të saj.
Njoftimi i policise
Rreth orës 22:35, tek lulishtja në rrethrrotullimin e Komunës së Parisit, në rrethana ende të paqarta, dyshohet se është plagosur me armë zjarri brenda mjetit të tij të parkuar shtetasi R.B, 22 vjeç, i cili ndodhet në spital, nën kujdesin e mjekëve.
Shërbimet e Policisë kanë bërë rrethimin e zonës dhe po vijojnë kontrollin e saj për të bërë të mundur identifikimin dhe kapjen e autorit.
Grupi hetimor ndodhet në vendngjarje dhe vijon punën për sqarimin e rrethanave të ngjarjes dhe dokumentin e plotë të saj.
