Papa Françesku tha të mërkurën se ishte i pikëlluar dhe i turpëruar nga paaftësia e Kishës Katolike për t’u marrë me abuzimin seksual të fëmijëve në Francë dhe se Kisha duhet ta bëjë veten një “shtëpi të sigurt për të gjithë”.
“Unë do të doja t’u shpreh viktimave trishtimin, pikëllimin për traumën që kanë pësuar dhe gjithashtu turpin tim, turpin tonë, për paaftësinë e kishës, për një kohë të gjatë, për t’i vënë ato në qendër të shqetësimeve të saj”, tha Papa Françesku në një auditor të përjavshëm.
Duke folur një ditë pasi një hetim i madh zbuloi se kleri francez kishte abuzuar me më shumë se 200,000 fëmijë mbi 70 vjet, Papa ftoi katolikët në Francë të merrnin përgjegjësinë për atë që kishte ndodhur në mënyrë që ta bënte Kishën një “shtëpi të sigurt për të gjithë”.
“Ky është momenti i turpit”, tha ai, duke u bërë thirrje peshkopëve të bëjnë çdo përpjekje për të siguruar që tragjedi të ngjashme të mos ndodhin përsëri.
Para se të fillonte auditori, papa dhe disa peshkopë francezë vizitues u lutën në heshtje për viktimat e abuzimit.
Abuzimet më të shumta kishin ndodhur gjatë viteve 1950-1970, tha komisioni hetimor në raportin e tij, me një ringjallje të dukshme në rastet në fillim të viteve 1990.
Papa shtoi se ai ishte pranë priftërinjve francezë që kishin të bënin me një sfidë “të vështirë, por të shëndetshme”. Ai shtoi se tashmë kishte shprehur mirënjohjen e tij për viktimat për guximin që kishin në daljen përpara dhe denoncimin e asaj që kishin kaluar.
