Një avion i vogël ka pësuar një defekt në ajër gjatë ditës së sotme dhe për rrjedhojë ka bërë ulje të detyrueshme në zonën e Kelmendit, në Malësinë e Madhe. Mësohet se brenda avionit kanë qenë dy persona të cilët kanë arritur të shpëtojnë. Menjëherë pas uljes, piloti tentoi të fluturojë sërish por nuk ia kanë dalë, ndaj u detyruan të largohen. Disa banorë të zonës kanë tentuar të afrohen, por ata nuk i kanë lejuar
“BalkanWeb” ka zbardhur detaje nga ngjarja e ndodhur dhe raporton se avioni ishte i ngjashëm me rastin e avionit të famshëm të Divjakës, i cili u rrëzua me drogë.
Më pas, aty ka mbërritur një mjet tip “Fuoristradë”, që i ka marrë dy personat dhe janë larguar, ndërsa nuk dihet ende nëse ata janë turistë, apo ngjarja lidhet me situatën e trafikut të kanabisit në vend. Gjithashtu, nuk dihet ende se ku ndodhen dy personat që ndodheshin në avion. Ndërkohë autoritetet e Policisë nuk kanë mbërritur ende në vendngjarje për shkak të terrenit të vështirë dhe lartësisë.
Njoftimi i policisë:
Shkodër/Informacion paraprak
Më datë 04.10.2021, rreth orës 12:30, është marrë informacion se në zonën e Vermoshit, në kufirin ndarës ndërmjet Shqipërisë dhe Malit të Zi (vendi i papërcaktuar) është rrëzuar një avion i vogël.
Menjëherë janë nisur shërbimet nga DVP Shkodër dhe Komisariati i Policisë Malësi e Madhe, së bashku me Policinë Kufitare për verifikimin e rastit.
