Një ngjarje e rëndë ndodhi ditën e sotme në Ishëm Lezhë, ku një oficer i krimeve u vra me armë zjarri nga një 21-vjeçar. Në lidhje me këtë ngjarje ka reaguar edhe deputeti i Partisë Demokratike, Enkeled Alibeaj. Ai i shpreh ngushëllime familjes së nënkomisarit Saimir Hoxha, i cili mbeti i vdekur në krye të detyrës mëngjesin e ditës së sotme. Alibeaj e ka cilësuar këtë si një tragjedi të paralajmëruar. Ai ka vazhduar më tej duke thënë se prej vitesh punonjësit e policisë që punojnë me ndershmëri në mbrojtje të rendit dhe sigurisë, sipas tij janë braktisur nga shteti.
Postimi i plotë i Enkelejd Alibeajt
I shprehim ngushëllimet tona familjes së nën/komisarit të policisë, Saimir Hoxha, të vrarë sot në detyrë, teksa kontrollonte për kanabis në zonën e mbrojtur të Kune-Vainit.
Fatkeqësisht kjo është një tragjedi e paralajmëruar, sepse prej vitesh punonjësit e policisë që shërbejnë me ndershmëri në mbrojtje të rendit dhe sigurisë janë braktisur nga shteti i gjunjëzuar përpara krimit, i cili është në revansh për shkak të modelit të bashkëpunimit me krimin të frymëzuar nga ky regjim i korruptuar.
Prej vitesh, Shqipëria e sunduar nga Edi Rama është kthyer në vendin kryesor të prodhimit të kanabisit në Europë, pasojat e këtij vullneti të mbrapshtë politik janë shkatërruese për shoqërinë dhe institucionet tona.
Që krimi të mos guxojë, që rendi dhe siguria të kthehet në normalitet, zgjidhja që kemi përpara është vetëm një, ndarja përfundimtare e politikës nga krimi dhe ndëshkimi i modelit të ndërtuar nga Edi Rama, i cili ka shkaktuar dhe shkakton vetëm dhimbje dhe pasiguri në familjet shqiptare!
