Davide Pecorelli dëshmoi të hënën përpara hetuesve në Perugia. Ai tregoi se për disa muaj kishte qëndruar në Medjugore, qytet në Bosnje Hrcegovinë, në një komunitet murgjrish.
Medjugore është vendi i cili njihet si “Lurda e Ballkanit” , pra një vend i shenjtë ku virgjëresha Mari iu shfaq përsëri 6 vegimtarëve 40 vite më parë. Pecorelli nuk udhëtoi drejt Medjugores për shkak të besimit të tij, por për të kërkuar një thesar. Mediat italiane shkruajnë se Davide Pecorellin e ka ndihmuar që të shkojnë në vendin e shenjtë një prift të cilin e kishte njohur në Shqipëri. Po ashtu më herët në mediat italiane ka qarkulluar edhe një pistë, se Davide Pecorelli është koleksionues, duket se kjo pistë është konfirmuar së fundmi, pasi vetë ai u ka thënë se po kërkonte “thesar monedhash”.
Kujtojmë se ditën e djeshme ai ka pohuar para drejtësisë italiane se kishte kryer krime në Shqipëri “Unë nuk kisha asgjë për të fshehur. Kam kryer gjithsesi krime, për të cilat do të flasë prokurori. Pjesa e parë e historisë është tragjike, por nuk do të jem unë ai që do ta rrëfejë këtë gjë”, deklaroi 45-vjeçari. Pecorelli i humbi gjurmët mesnatën e 6 janarit, ndërsa makina ku ai udhëtonte u gjet e djegur në Pukë dhe brenda saj janë gjetur mbetje kockore, të cilat mjekësia nuk arriti ti vërtetonte kurrë që ishin të tijat.
Për 8 muaj ai humbi kontaktet, por do të zbulohej pas një incidenti me varkë në ishullin e Montecristos, ku rrezikoi mbytjen.
