Autoritetet e Policisë së Pogradecit kanë bërë të mundur arrestimin e shtetasit Bledi Larti pasi me mjetin tip “Audi” nuk iu bind urdhërit të policisë për të ndaluar dhe gjatë tentativës për t’u larguar aksidentoi efektivin e policisë.
Ngjarja ndodhi rreth orës 21:45. Salla Operative e Policisë Librazhd është njoftuar nga Komisariati i Policisë Pogradec, se mjeti tip “Audi”, me drejtues shtetasin Bledi Larti, nuk i ishte bindur urdhrit të shërbimeve të Policisë Pogradec për të ndaluar, por kishte vijuar lëvizjen me shpejtësi në drejtim të Librazhdit.
Me marrjen e njoftimit janë organizuar shërbimet e Policisë, të cilat kanë ngritur pikë kontrolli në aksin rrugor Prrenjas-Pogradec. Drejtuesi i mjetit tip “Audi”, kur ka konstatuar shërbimet e Policisë, përsëri nuk i është bindur urdhrit të punonjësit të Policisë për të ndaluar, por ka vijuar lëvizjen me shpejtësi duke aksidentuar punonjësin e Policisë së Patrullës së Përgjithshme, shtetasin Sokol Hoxha, i cili ndodhet jashtë rrezikut për jetën. Në ndjekje të automjetit janë vënë shërbimet e tjera të Policisë dhe në qytetin e Librazhdit është bërë i mundur ndalimi i tij.
Në përfundim të veprimeve hetimore, nga oficeri i Policisë Gjyqësore pranë Prokurorisë së Rrethit Gjyqësor Elbasan u arrestua në flagrancë për veprat penale “Vrasja në rrethana të tjera cilësuese” e mbetur në tentativë dhe “Shkelja e rregullave të qarkullimit rrugor”, 31-vjeçari, banues në Tiranë dhe materialet procedurale i kaluan Prokurorisë, për veprime të mëtejshme.
