Një ngjarje e rëndë ka ndodhur në Drenas ku një 23-vjeçare ka ndërruar jetë, si pasojë e marrjes së vaksinës anti-Covid.
Familjarët e saj nuk kanë ngurruar të reagojnë dhe kanë deklaruar se vdekja ndodhi tri ditë pasi ka marrë dozën e parë të vaksinës kundër koronavirusit. Familjarët e 23-vjeçares, Zarife Imeri, në rrjetet sociale kanë shpërndarë lajmin për vdekjen e saj, teksa thonë se ajo ka humbur jetën 48 orë pasi është vaksinuar.
Në bazë të informacioneve të marra “Telegrafi” ka kontaktuar me Qendrën e Mjekësisë Familjare në Drenas për të sqaruar informatat rreth arsyes se pse vajza nga Drenasi ka vdekur tri ditë pasi është vaksinuar dhe se a ka pasur paraprakisht ndonjë informatë shëndetësore për pacienten.
Drejtori i Qendrës Kryesore të Mjekësisë Familjare në Drenas, Ismet Bogiqi, ka konfirmuar se vajza është vaksinuar më datën 13 shtator, në procedurë të rregullt. “Vajza është vaksinuar me procedurë të rregullt, më 13 shtator, ka marrë dozën e parë të vaksinës Pfizer. Nuk ka pasur ndonjë problem gjatë vaksinimit, Mjekësia ligjore tani do të merret me rastin”, deklaroi ai. Lidhur me rastin, Telegrafi ka provuar të marrë edhe një përgjigje nga Ministria e Shëndetësisë dhe Instituti Kombëtar i Shëndetit Publik (IKSHPK), por që deri në këto momente nuk ka pranuar ndonjë përgjigje.
Në Kosovë është duke vazhduar të ketë numër të madh të personave të infektuar me COVID-19, por në të njëjtën kohë ka vazhduar edhe vaksinimi i qytetarëve pa ndonjë komplikim serioz të paraqitur nga institucionet shëndetësore dhe përgjegjëse. Prej fillimit të vaksinimit në të gjitha qytetet e Kosovës janë dhënë 1.089.615 doza të vaksinës, deri më sot 385.297 qytetarë janë vaksinuar me dozën e dytë. Në Kosovë janë duke u aplikuar dy lloje të vaksinës kundër COVID-19, Pfizer dhe AstraZeneca.
