Gjyqtari Piro Sota, i cili kishte liruar nga burgu Elton Metën, është përjashtuar për 15 vite nga drejtësia shqiptare. Veprimi i Sotës rezultoi në tragjedi, pasi mbrëmjen e djeshme Meta vrau me armë zjarri ish-bashkëshorten e tij Sabrina Bengaj.
Dy ditë më parë, pra në paraditen e 9 shtatorit, Komisioni i Vetingut, me trupë gjykuese të përbërë nga Firdes Shuli, Xhensila Pine dhe Olsi Komici, përjashtoi gjyqtarin e Fierit nga drejtësia. Procesi i verifikimit për Piro Soton kishte nisur që në qershor të vitit 2020.
Ish-gjyqtari vendosi për lirmin e Elton Metës në 26 korrik 2021. Ndërkohë, dy ditë më vonë KLGJ informoi në Komisionin e Vetingun se Sota kishte dhënë dorëheqjen.
Por Piro Sota nuk është një emër i panjohur për marrjen e vendimeve të dyshimta. Jo më larg se 31 janari i këtij viti, Sota liroi nga burgu tre të akuzuar për vrasjen e 57-vjeçarit Pelivan Sinanrrapaj. Bëhet fjalë për Ferdinand Merkaj, Fitim Zekaj e Festim Alimerkaj, me argumentin se nuk paraqesin ‘rrezikshmëri shoqërore’. Prokuroria kërkoi masën e arrestit me burg për tre të akuzuarit, për ngjarjen e rëndë që ndodhi në Ballsh, dhe madje paraqiti pamje filmike dhe dëshmi për dhunën që i shkaktoi më pas vdekjen të ndjerit, por sërish Sota vendosi për lirimin e tyre. Kur skandali u publikua në media, Gjykata e Fierit riktheu në burg të akuzuarit për vrasjen e 57-vjeçarit.
Piro Sota, në tetor të vitit 2019, la të lirë anëtarin e Bandës së Durrësit, Sardian Sulejmanin, i dënuar me 25 vite burg për vrasjen e Avni Gashit në tetor 2005 në Tiranë si dhe për dy atentate ndaj kreut të bandës, Lul Berisha, pas përçarjes së bandës. Me argumentin se e ka babanë vetëm, Sota i fali 5 vite burg Sulejmanit.
Ishte po ky gjyqtar që në shtator të vitit 2018 liroi nga burgu me kusht, kur i kishin mbetur edhe 1 vit e 8 muaj, Ermal Hoxhën, nipin e diktatorin Enver Hoxha. Ai ishte dënuar me 6.8 vite burg për trafik droge, konkretisht për dosjen ‘Xibraka’.
Po ashtu, Sota ka gisht edhe në lirimin nga burgu të Fatmir Kajollit, mikut të Fatmir Mediut. Kajolli ishte dënuar në Itali dy herë me 40 vite burg si pjesë e një organizate kriminale të narkotikëve dhe nuk bëri më shumë se dy vite burg në Shqipëri. Sota mori tre vendime duke i ulur dënimin Kajollit, derisa e liroi nga burgu më 19 mars 2018.
Në vitin 2015, Sota hoqi nga lista e personave në kërkim Thoma ose Armand Shkurti. Ai ishte i dënuar me 12 vite burg për “Shfrytëzimi i prostitucioni”. Gjyqtari i njohu Skurtit shlyerjen e dënimit, edhe pse nuk kishte bërë asnjë ditë burg, pasi 10 vite më vonë ai nuk ishte kapur nga policia.
Një tjetër akuzë vjen për Piro Sotën nga gruaja që filmoi ish- kreun e Gjykatës së Gjirokastrës Guximtar Boçi, i cili i kërkonte favore seksuale që të jepte jë vendim në favor të saj. Ajo ka thënë se Piro Sota bashkëpunuar me Boçin për t’i mbyllur dosjen. Guximtar Boçi i shpëtoi ndëshkimit falë Gjykatës së Fierit.
Në kohën kur ishte ministër i Brendshëm, Saimir Tahiri e denoncoi gjyqtarin për lirim nga burgu të të arrestuarave nga policia për vjedhje. Edhe ministri i Brendshëm Bledi Çuci, denoncoi në qershor të këtij viti se Sota liroi një person të arrestuar për armëmbajtje pa leje, në bashkëpunim me prokurorin Erind Rahovica.
Ndërkohë, ka ardhur edhe reagimi i Inspektoriatit të Lartë të Drejtësisë, që ka njoftuar se ka nisur menjëherë vlerësimi i rastit dhe i të dhënave që kanë dalë në media mbi veprimet e magjistratëve.
‘Prej momentit të parë, jam duke ndjekur me vëmendje raportimet mbi ngjarjen e rëndë të vrasjes së një 23 vjeçareje nga ish bashkëshorti në Zhupan të Fierit. Ka nisur menjëherë vlerësimi i rastit dhe i të dhënave që dalin në media mbi veprimet e magjistratëve.’- njofton ILD.
