Kreu i Partisë Demokratike, Lulzim Basha pas përfundimit të seancës plenare është larguar së bashku me grupin e PD-së. Ajo që është vënë re ka qenë fytyra e tij e ngrysur dhe largimi me kokën ulur. Ndërsa është pyetur nga gazetarët , kreu i PD-së ka thënë se i vetmi armik është Edi Rama.
” Shqipëria, shqiptarët, demokracia e shqiptarëve, e ardhmja e tyre, ka një dhe vetëm një armik, Edi Ramën dhe regjimin e dalë nga zgjedhjet e vjedhura, të cilat PD nuk i njeh.”- ka folur shkurt Basha teksa po shkonte drejt selisë së demokratëve.
Ndër të tjera ai është pyetur nga gazetarët nëse ka pasur presione për përjashtimin e Berishës ndaj grupit të parlamentar i PD-së.
Kujtojmë se ish-kryeministri ka hedhur një sërë akuzash në dy ditët e fundit mbi një marrëveshje të mundshme Basha-Rama për përjashtimin e tij nga grupi i PD.Ditën e djeshme, Lulzim Basha njoftoi vendimin e tij si kryetar për të përjashtuar nga grupi parlamentar i PD, Sali Berishën derisa zgjidhte pozicionin me DASH pas shpalljes ‘non grata’.
Menjëherë Berisha e kundërshtoi vendimin e Bashës duke e akuzuar këtë të fundit për pakte me Edi Ramën dhe se ka qenë i detyruar pasi është kërcënuar me sanksione. Sot Berisha pavarësisht këtij vendimi shkoi dhe u paraqit në Kuvend, por si deputet i pavarur edhe pse pretendon se është anëtar i grupit parlamentar të PD.
