Ministrja e Shëndetësisë dhe Mbrojtjes Sociale, Ogerta Manastirliu ka zhvilluar ditën e sotme një bisedë telefonike me homologun e saj të Maqedonisë së Veriut, Venko Filipce. Manastirliu i ka shprehur ngushëllimet për qytetarët që humbën jetën në tragjedinë e Tetovës. Ndër të tjera ajo ka shtuar se e sigurova për gatishmërinë për t’a ndihmuar me të gjitha mundësitë dhe burimet tona në këto momente të vështira.
“Gjatë bisedës me kolegun Venko Filipce të Maqedonisë së Veriut, i shpreha ngushëllimet për qytetarët që humbën jetën në tragjedinë e Tetovës, dhe e sigurova për gatishmërinë tonë, për të ndihmuar me të gjitha mundësitë dhe burimet tona, në këtë moment të vështirë për fqinjët tanë”, shkruan ministrja e Shëndetësisë dhe Mbrojtjes Sociale.
Kujtojmë se një ngjarje tragjike ndodhi mbrëmjen e djeshme në Tetovë, ku një spital COVID u përfshi nga flakët dhe për pasoj humbën jetën në mënyrë tragjike 14 persona. Autoritet kanë lajmëruar ditën e sotme se të gjallë janë nxjerrë 12 persona të cilët po marrin kujdesin shëndetësor e nevojshëm dhe ndodhen jashtë rrezikut për jetën.
Ndërsa organet hetimore, janë vendosur në lëvizje për të zbardhur motivet e plota të tragjedisë së ndodhur në spitalin e Tetovës. Sipas informacioneve të marra mësohet se spitali i COVID-19 në Tetovë ka rezultuar me gabime infrastrukturore.
