Gazetari investigativ, Artan Hoxha ka deklaruar se në Shqipëri ka hyrë kanabisi i quajtur “Gorrilla”. Kjo bimë është më e kërkuara në vendet e Bashkimit Evropian dhe njihet me këtë emër për shkak të forcës që ka.
Sipas një deklaratë të bërë nga gazetari në ABCneës, kjo bimë e re ka hyrë për herë të parë në Shqipëri dhe se duhen vetëm 60 ditë përkujdesje që ajo të japë rezultate. Hoxha ka shpjeguar se trafikantët kanë përdorur tranzicionin e qeverisë nga zgjedhjet deri në formimin e qeverisë së re për të kultivuar kanabisin. Sipas tij duke qenë se nga zgjedhjet deri në formimin e qeverisë së re, institucionet nuk janë në maksimumin e funksionimit të tyre, trafikantët kanë përfituar duke mbjell dhe korrur bimën narkotike.
Po ashtu ai ka thënë se Shqiptarët po kultivojnë kanabis në masë në Spanjë, që më pas e tregtojnë në Gjermani dhe vende të tjera të BE. Sipas Hoxhës, shqiptarët kanë zgjedhur Spanjën për të zhvilluar këtë aktivitet kriminal për shkak të ligjeve më të buta se në vendet e tjera të BE. Hoxha ka thënë se e veçanta e kësaj bime është fuqia e saj pasi në krahasim me bimët e tjera të cilat THC 14-16%, Gorilla përqendrimin e THC e ka 25%. Ai ka shpjeguar se bima është e ndarë në disa kate dhe se prodhimi ishte maksimal.
“Përveç farës tradicionale në Shqipëri, u kultivua një farë e re. Do vetëm 60 ditë në tokë dhe është farë hibrid. E krijuar në laborator në Spanjë. Kjo quhet “Gorilla” prej fuqisë që ka. Deri tani THC në bimët e kultivuara më parë ka qenë nga 14 deri në 16 %. Kjo farë, kanabisi “gorilla” e ka 25 %THC, gati dyfishi. Gorilla do vetëm 60 ditë, 8-9 javë. Në parcelën që kam hyrë unë, ata që e kanë kultivuar kishin rendiment maksimal. Nga një degë kryesore e kanë nxjerrë me 5 kate. Në varësi të trajtimit është edhe prodhimi.” tha Hoxha.
Sipas gazetarit çmimi i një kilogram kanabis “Gorilla” shkon në 4500 euro.
“Në rastin konkret ata janë profesionistë. Në ambiente të hapura. Kjo e ka çmimin 4500 euro. 4 herë më shumë se bima. Nga 100-200 gram për bimë. Është për treg Europian. Se është shumë cilësore. Është një bimë e mirë nga Europa dhe aplikuar në Shqipëri.”, ka thënë gazetari.
