SPAK kërkon rinisjen e gjykimit për ish-ministrin e Mbrojtjes, Fatmir Mediun.
Sipas informacioneve të marra mësohet se do të jetë Kryetarja e Apelit të GJKKO-së, Saida Dollani ajo e cila do ty shqyrtojë çështjen në Apelin e Posaçëm për Fatmir Mediun. Seanca gjyqësore do të zhvillohet në dhomë këshilllimi më datën 17 shtator ora 10:00.
Në Apelin e GJKKO-së, SPAK ka dorëzuar ankimim pas vendimit të Gjykatës së Lartë që shpalli moskompetencë dhe vendimit të Gjykatës së Posaçme të Shkallës së Parë për Korrupsionin dhe Krimin e Organizuar.
SPAK kërkon revokimin e vendimit të Gjykatës së Posaçme të shkallës së parë, që ka rrëzuar kërkesën e Prokurorisë së Posaçme për rihapjen e hetimeve për ish-ministrin e Mbrojtjes Fatmir Mediu, lidhur me shpërthimin e ndodhur 13 vite me parë në një depo ushtarake në Gërdec. Pas tragjedisë së Gërdecit në mars 2008, Prokuroria e Përgjithshme regjistroi procedimin penal ndaj ish-ministrit të Mbrojtjes, Fatmir Mediu, duke e akuzuar atë dy herë për shpërdorim detyre sipas Kodit Penal dhe Kodit Penal Ushtarak.
Megjithatë, Mediu nuk u gjykua asnjëherë, pasi me rizgjedhjen e tij deputet në shtator të vitit 2009, Gjykata e Lartë vendosi të pushojë çështjen me argumentin se ai kishte imunitet parlamentar. Dymbëdhjetë vjet më vonë, SPAK i kërkoi Gjykatës së Lartë që të rihapë çështjen e Mediut, bazuar në kërkesën e Zamira dhe Feruzan Durdajt, prindërit e njërit prej viktimave më të vogla të tragjedisë.
Gjykata e Lartë e “pasoi” çështjen për kompetencë në Gjykatën e Posaçme, e cila fajëson prokurorinë për mosveprim për më shumë se një dekadë dhe vendosi ta rrëzojë kërkesën që do t’i hapte rrugë nisjes së gjykimit për Mediun.
