Menjëherë pas shpalljes së qeverisë së re të talebanëve në Afganistan, protesta kanë filluar në qytetin perëndimor të Heratit. Të paktën dy persona kanë mbetur të vrarë dhe tetë u plagosën gjatë tubimit, nga të shtënat me armë zjarri.
Protesta në Herat ishte një nga protestat që u zhvilluan kundër regjimit të ri, i cili të martën emëroi udhëheqjen e tij për një qeveri të re afgane, pas marrjes me forcë të vendit.
Në kryeqytetin Kabul, të shtëna të forta shpërthyen ndërsa talebanët u përpoqën të shtypnin një protestë, ka raportuar korrespondenti i Euroneës në Kabul. Njerëzit injoruan urdhrat e talebanëve për t’u shpërndarë për dy orë, ndërsa luftëtarët u përpoqën të bllokonin rrugët dhe të kalonin nëpër protestë. Talebanët më pas filluan të qëllonin për të shpërndarë protestën dhe u thanë gazetarëve që të ndalonin xhirimet. Rruga ishte e qetë pas dhjetë minutash të shtënave pa pushim.
Ahmad Massoud, i cili ka udhëhequr luftëtarët e rezistencës atje, bëri thirrje për një “kryengritje kombëtare” kundër talebanëve. Në Kabul, gratë kanë protestuar kohët e fundit në mbështetje të të drejtave të tyre.
Kur talebanët sunduan më parë në Afganistan midis 1996 dhe 2001, gratë nuk lejoheshin të punonin ose të shkonin në shkollë dhe mund të dilnin nga shtëpia vetëm me një shoqërues mashkull.
