Deputeti i dorëhequr i Partisë Demokratike, Mark Marku ka dalë hapur kundër përfshirjes së Sali Berishës në parlament dhe ka thënë se duhej të sihte larguar që në 2013-ën. I ftuar në emisionin “Opinion”, Marku tha se duke qëndruar, Berisha ka krijuar mbivendosje të lidershipit dhe kjo është një nga arsyet pse PD nuk ka ardhur në pushtet.
“Sali Berisha në 2013 duhej të ishte larguar. Nuk duhej të kishte qëndruar. Po them sikur të isha unë. Cikli normal i politikave në demokraci është 8 – 8, pra 8 vite në opozitë dhe 8 vite në qeveri. Edhe të ikin. Berisha ka qenë në opozitë, ka ardh në pushtet e ka dyfish këtë aktivitet politik, ka kaluar prapë në opozitë, ka kaluar prapë në pushtet. Jep dorëheqje! Meritë e madhe që bëri zgjedhje, nuk i prishi zgjedhjet, iku vetë. Duhej ta kishte ndërprerë karrierën. Duke mos e ndërprerë ka krijuar një lloj mbivendosje të roleve. Një lider historik që ka peshën në parti dhe duke qenë aty elektrizon dhe një lider tjetër, po themi formal. Kjo mbivendosje e lidershipit është një nga arsyet pse PD nuk ka ardhur në pushtet”, u shpreh Marku.
Më tej ai foli edhe për vendimin që Basha duhet të marrë në lidhje me këtë cëcshtje, duke treguar se propozimi i tij ka qenë që Berisha t’i ngrijë marrëdhëniet me PD-në. Por Sipas Markut, ky është një vendim i vështirë për Bashën, pasi është Berisha ai që e ka promovuar si lider të PD.
“Unë kam propozuar një formulë që Berisha ngrin marrëdhëniet me PD, nuk i jep kosto PD, vazhdon betejën e vet dhe në momentin që zgjidhet çështja merr një drejtim tjetër. Por Basha e ka shumë vështirë sepse si lider të PD e ka promovuar Sali Berisha. E ka vendim shumë të vështirë nga pikëpamja morale, etike”, tha Marku.
