Specialistët për Hetimin e Krimeve në Komisariatin Policisë Korçë, kanë finalizuar me sukses operacionin e koduar “Farmacia”, si rezultat i të cilit u bë i mundur kapja dhe arrestimi në flagrancë i autorit të dyshuar, shtetasit Nikolin Ciko., 43 vjeç, banues në Korçë (me detyrë infermier pranë Urgjencës së Spitalit Korçë).
Ky shtetas kishte vjedhur në farmacinë e Spitalit, një sasi medikamentesh dhe pajisjesh mjekësore, të cilat shërbenin për trajtimin e pacientëve me COVID-19 dhe me sëmundje tumorale.
“BalkanWeb” ka bërë të mundur zbardhjen e detajeve të reja nga arrestimi i infermierit të Spitalit të Korçës, Nikolin Ciko, pasi kishte vjedhur ilaçet dhe pajisjet mjekësore të të sëmurëve me koronavirus dhe sëmundje tumorale, me vlerë rreth 1 milion lekë.
Siç mësohet nga informacionet e e marra nga “BalkanWeb” infermieri Ciko nuk ka bërë një mohim të ngjarjes së ndodhur por ka pranuar vjedhjen e ilaçeve para uniformave blu.
Burime bëjnë me dije se infermieri është shprehur se i ka vjedhur ilaçet për arsye borxhesh, madje ai ka shkuar edhe më tej, duke thënë se ka edhe një kredi për të shlyer.
Nikolin Ciko, infermier në urgjencë, ka shërbyer gjatë periudhës së pandemisë, duke u marrë me pacientët me Covid, të cilëve mendohet t’u ketë shitur medikamentet e vjedhura.
